Qostanaıdaǵy kisi ólimine 5 jyl buryn qaıtys bolǵan adamdy kináli dep tapqan

ASTANA. QazAqparat - Osydan 33 jyl buryn Qostanaı oblysynyń Fedorov aýdanynda áıel kisini óltirý deregi tirkelgen, dep habarlaıdy QazAqparat Bas prokýratýraǵa silteme jasap.

Keıinnen qylmysty izin sýytpaı ashý múmkin bolmaǵandyqtan, is arhıvke ótkizilgen. 2022 jyly, ıaǵnı 32 jyldan keıin aýdan polıtsııasy kisi óltirýshini anyqtaý jáne tergeýdi aıaqtaý týraly baıandaǵan. Óz erkimen kinásin moıyndaý negizinde J degen azamat kináli dep tanylǵan.

Bul rette, kisi óltirý isi kúdiktiniń qaıtys bolýyna baılanysty toqtatylǵan.

«Alaıda prokýratýra anyqtaǵandaı, J kináli bolyp tanylǵannan 5 jyl buryn qaıtys bolǵan. Basqasha aıtqanda, ol kinásin moıyndaý týraly jazbaǵan, qylmys jasaýdaǵy kinási qylmystyq is materıaldarymen dáleldenbegen.

Osylaısha, polıtsııa qyzmetkerleri qylmystyń ashylý kórsetkishterin jasandy túrde arttyrý maqsatynda qylmystyq zańnamanyń negizgi qaǵıdattaryn buzǵan», - dep jazdy vedomstvodan.

Prokýratýra J-ny kináli dep taný týraly barlyq protsestik sheshimderdiń kúshin joıdy.

Tergep-tekserýdi uıymdastyrý basqa organǵa júkteldi.

Kináli qyzmetkerlerge qatysty jaýapkershilikke tartý týraly másele kóterildi.

Osy mán-jaılardy anyqtaý úshin Bas prokýratýra qyzmetkerlerine óńirge barýdyń qajettiligi týyndamady.

Elektrondyq formattaǵy is aqparattyq júıeler arqyly onlaın-rejımde zerdelendi.