Qostanaıdaǵy kentke qala mártebesi berilip, Tobyl dep atalmaq
QOSTANAI. QazAqparat - Qostanaı oblysyndaǵy Zatobol kentinde osy eldi mekenge qala mártebesin berý jáne atyn ózgertý máselesine arnalǵan jergilikti qoǵamdastyqtyń jınalysy ótkizildi, dep habarlaıdy QazAqparat tilshisi.
«Birinshi másele boıynsha jurt biraýyzdan sheshim qabyldady. Ekinshi máselege oraı jınalǵandardyń basym kópshiligi «Iá» dep daýys berdi. Elimiz kartasynda jańa Tobyl qalasy paıda bolmaq», - dep málimdedi Qostanaı aýdany ákiminiń orynbasary Bolat Bekenov.
B. Bekenovtiń aıtýynsha, jeti kún ishinde kent ákiminiń apparaty jınalystyń hattamasyn jarııalaýy tıis, sodan soń ataýyn ózgertý boıynsha jumystar júrgiziledi.
Jınalysta jańa qalanyń turǵyndary qujattaryn aýystyrýyna qajettilik joq ekeni, olardyń barlyǵynyń zańdy kúshi saqtalatyny aıtyldy.
