Qostanaıdaǵy qazaq-túrik lıtseıi oqýshylarynyń ýlaný sebebi anyqtaldy
ASTANA. QazAqparat - Qostanaıdaǵy qazaq-túrik lıtseıi oqýshylarynyń ýlaný sebebi anyqtaldy. Bul týraly búgin QR Ulttyq ekonomıka mınıstrliginiń Tutynýshylar quqyǵyn qorǵaý komıteti tóraǵasynyń orynbasary Jandarbek Bekshın málim etti.
«Ózderińiz de biletindeı, mektep-ınternatta turatyn lıtseıdiń 18 oqýshysy ýlanyp, aýrýhanaǵa túsken bolatyn. Qazirgi ýaqytta biz onyń sebebin bilemiz. Rotovırýs pen stafılokokk anyqtaldy. ıAǵnı, eki stafılokok qozdyrǵyshy tamaq daıyndaý bóliminde jumys isteıtin aspaz ben tehnıkalyq jumysshydan tabyldy. Aspaz atalǵan vırýsty tasymaldaýshy», - dedi ol.
Onyń aıtýynsha, qazirgi ýaqytta demalys bolǵandyqtan mektep jabyldy.
«Onda aldyn alý sharalarynyń barlyq túri júrgizilýde. Qazirgi ýaqytta biz qozdyrýshy men tasymaldaýshyny anyqtap, barlyq sharalardy atqarýdamyz», - dedi J.Bekshın.
Esterińizge sala keteıik, 24 jeltoqsan kúni Qostanaı qalasyndaǵy aýrýhanaǵa qazaq-túrik lıtseıiniń 20 oqýshysy túsken bolatyn. Olardyń 18-i ýlaný kúdigimen aýrýhanaǵa jatqyzylǵan edi.
