Qostanaıdaǵy Qazaq kóshesiniń ataýy ózgermek
QOSTANAI. QazAqparat - Oblys ortalyǵynda qos kósheniń ataýy ózgerýi múmkin, dep habarlaıdy QazAqparat tilshisi Qostanaı qalasy ákimdiginiń mádenıet bóliminiń jetekshisi Aısulý Áýbákirovaǵa silteme jasap.
Mundaı usynys bastamashyl azamattar tobynyń tarapynan bolyp otyr. Olardyń pikirinshe Qostanaı qalasyndaǵy eki kósheniń atyn aýystyrý kerek. Anyǵyn aıtqanda, Avıatsıonnyı kóshesine Sotsıalıstik Eńbek Eri Kámshat Dónenbaeva esimin berip, Qazaq kóshesin Ábilsaı dep ataý usynylyp otyr.
«Qala ákimi Bazyl Jaqypovqa qostanaılyqtardyń bastamashyl toby qoǵamdyq hat joldady. Ol hatta dańqty jerlesimizdiń esimin qala kóshesine berý usynysy jazylǵan. Sondyqtan, biz turǵyndardy osy máselege qatysty beıjaı qalmaýǵa shaqyramyz. Asa mańyzdy túıtkilge oraı óziniń jeke pikirin bildirýge shaqyramyz», - deıdi Aısulý Áýbákirova.
Belgili bolǵandaı, Kámshat Dónenbaevanyń esimi týǵan ólkesi - Meńdiqara aýdanyndaǵy Borovskoı kásiptik-tehnıkalyq kolledjine de beriledi. Depýtattar sheshimimen qýattalǵan usynys úkimetke joldanady. Sondaı-aq, oblys ortalyǵynda irgesi qalanyp jatqan ıÝbıleınyı shaǵynaýdanynda Eńbek Eriniń atyndaǵy saıabaq paıda bolmaq. Saıabaq ishine dańqty jerlesimizdiń eskertkishi de ornatylady.
Al Qostanaıdaǵy ardager ustaz Beken Kópeshtiń sózinshe, Narımanov bazarynyń mańynda ornalasqan Qazaq kóshesiniń ataýyn aýystyrý týraly bastama biraz jyldan beri kóterilip keledi.
«Ózi kishkene ǵana aýmaqty alyp jatyr. Osy arada shamaly oılap kórińizdershi, óz jerimizde turyp, Qazaq dep kóshe ataǵanymyz uıat emes pe? Sol sebepti de, bul ýaqyt kúttirmeıtin sharýa», - dedi ol.
