Qostanaıdaǵy qaıyrymdylyq jyly «Sarqyt» dástúrimen bastaldy
Qazaqstan halqy Assambleıasynyń oblystyq fılıaly jobanyń qańtar aıyna belgilengen «Sarqyt» sharasyn ótkizdi.
«Sarqyt» aktsııasynyń sheńberinde qazaq halqynyń birden eki dástúri - «Tusaýkeser» jáne «Besikke salý» kórsetildi. Bul úshin áıelder men balalardy beıimdeý ortalyǵynda ómir súrip jatqan náresteli eki ana arnaıy shaqyrtylǵan.
Sahna tórinde salttardy iske asyrýdy, onyń tereń mán-maǵynasyn zaldaǵy kórermenderge túsindirýdi aq jaýlyqty ájeler mindetine alypty. Ájeler, uıymdastyrýshylar jastardyń arasynda mundaı vızýaldy sharalardyń jıi ótkizilý kerektigin jetkizdi.
Sonymen, eń áýeli Nursana esimdi eki aılyq náreste besikke salyndy. Tıisinshe, besiktiń ár bóligi jaıly aqparattar berilip, olarǵa qatysty yrym-joralǵylar egjeı-tegjeıli túsindirildi. Anasynyń altynshy balasy-Nursanaǵa da aq tilek arnalyp, áldı aıtyldy.
Álınur esimdi 1 jas, 3 aılyq balanyń tusaýyn kesip, «táı-táı» basqyzý qurmeti óńirge belgili ǵalym Álimjan Bekmaǵambetovke tapsyryldy. Qazaqtyń osy bir tamasha dástúriniń mánisi jaıly da júrgizýshi arýlar jan-jaqty túsinik berdi. Tórge tóselgen aq jol ústimen qaz-qaz qadam basqan Álınur tastalǵan zattardyń ishinen qamshyny qalap aldy. Muny jurtshylyq jaqsylyqqa balap, «naǵyz batyr bolyp óser» dep joryp, aq batalaryn berdi.
Bul qaıyrymdylyq aktsııasyn ótkizýge «Birlik» ázerbaıjan etnomádenı birlestigi, oblystyq tarıhı-ólketaný mýzeıi jáne «Aq darıǵa» qazaq ánderi hory kómek kórsetken.
Buǵan deıin habarlaǵanymyzdaı, joba aıasynda jyldyń ár aıynda qaıyrymdylyq sharalar ótkiziletin bolady.
«Biz qaıyrymdylyq aktsııasy barysynda basqa ult ókilderine qazaq halqynyń salt-dástúrleri men ádet-ǵuryptaryn tanystyrǵymyz keledi. Máselen, osy qańtar aıy biz jasaǵan kúntizbede «Sarqyt» dep atalady. Bul dástúrdiń máni - tamaqqa uqypty qaraý. Áleýmettik máni - as-sýdy basqalarmen, jaǵdaıy tómen adamdarmen bólisý. Biz óńirdegi barlyq bilim berý uıymyn, eńbek ujymdaryn qaıyrymdylyq aktsııasyn ótkizýdiń osyndaı formatyna qosylýǵa shaqyramyz. Sonymen qatar, aqpanda «Sybaǵa», naýryzda «Shashý» jobalaryn usynamyz. Sáýir aıynyń basynda jerlesterimizdi uzaq qystan keıin asarlatyp qoldaýǵa tıispiz. Bul aıdy «Asar» dep ataýymyzdyń sebebi sol. Aǵa urpaqqa qamqorlyq jasaý aıy - mamyr. Mektepter, joǵary oqý oryndarynyń túlekterine qoldaý kórsetýdi «Toqymqaǵar» aıynda, ıaǵnı, maýsymda ótkizemiz. Osylaısha, jyl boıy halyqtyń ártúrli toptaryn qamtyp, aktsııa uıymdastyrý josparlanǵan», - dep atap ótti QHA múshesi Erkin Ábil.
