Qostanaıdaǵy halyqaralyq áýejaıdyń ushý-qoný jolaǵy keńeıedi
QOSTANAI. QazAqparat -Qostanaıdaǵy halyqaralyq áýejaıdyń ushý-qoný jolaǵy keńeıedi. Bul týraly jýrnalıstermen ótken brıfıngte oblystyq jolaýshylar kóligi jáne avtomobıl joldary basqarmasynyń basshysy Baqytbek Esenǵulov málim etti, dep habarlady QazAqparat tilshisi.
Halyqaralyq áýejaıdyń ushý-qoný jolaǵyn qaıta jańartý úshin 4,6 mlrd teńge qajet. Joba boıynsha jolaqtyń uzyndyǵyn 300 metrge ulǵaıtý qarastyrylǵan.
«Jóndeý jumystary aıaqtalǵannan keıin áýe aılaǵynyń ushý baǵytyn artady. Sondaı-aq, áýejaı kólemdi júk borttaryn jetkizip, qabyldaı alatyn múmkindikke ıe bolady. Jańa baǵyttar ashýǵa da múmkindik aldyq. Endi jazda ǵana emes, qys aılarynda da «Qostanaı-Gannover(Germanııa)» baǵytynda ushýǵa bolady. Bul týraly Air Astana kompanııasymen kelissózder júrgizilýde. Osy áýe jolynyń ashylýy qostanaılyqtar úshin jaqsy jańalyq bolary sózsiz, - dedi B.Esenǵulov.
Basqarma basshysynyń aıtýynsha, aldaǵy ýaqytta Shymkent-Qostanaı-Ekaterınbýrg reısi ashylady. SCAT Airlines áýe kompanııasymen kelisim jasalyp jatyr. Sonymen qatar, qostanaılyqtar Aqtóbe men Atyraýǵa tikeleı ushýy múmkin. Sebebi, atalǵan baǵyttarǵa halyqtyń suranysy joǵary.
Aıta keteıik, áýejaı qyrkúıek aıyna deıin QR Investıtsııalar jáne damý mınıstrliginiń balansynda bolyp keldi. Atalǵan nysan jaqynda respýblıkalyq menshik tiziminen alynyp tastalyp, kommýnaldyq menshikke ótti.
Aıta keteıik, halyqaralyq áýejaı Qostanaı qalasynan ońtústik-batysqa qaraı 2 shaqyrym jerde ornalasqan. Bir jyl ishindegi reıs sany - 1700. Jetkiziletin júk pen poshtanyń kólemi - 250 tonnadan astam.
