Qostanaıdaǵy ǵasyrdan astam tarıhy bar meshit buzylmaıdy
El arasynda Aqmeshit ataýymen tanymal Maral ıshan meshiti 1893 jyly turǵyzylǵan. Ekinshi Dúnıejúzilik soǵys jyldarynda onda evakýatsııalyq pýnkt ornalasty. Soǵystan keıingi jyldary kınoteatr, 1980-1991 jyldary fılarmonııa jaıǵasty. 1991 jylǵy 1 qarashada meshit halyqqa qaıtaryldy. Sol jyly 70 jyl úzilisten keıin alǵash ret Qurban aıt namazy oqyldy.
2002 jyly meshitke ǵulama Maral ıshan Qurmanulynyń esimi berildi.
Oblystyq mádenıet basqarmasynyń basshysy Erlan Qalmaqovtyń aıtýynsha, atalǵan meshit tamyz aıyna deıin Qazaqstan musylmandary dinı basqarmasynyń balansynda bolǵan.
«Meshit eki jyl boıy paıdalanbaı turdy. Ǵımarat eskirdi, ishi-syrty ábden tozǵandyqtan, ony áýeli qalpyna keltirý qajet. Osy ýaqytqa deıin ǵımaratty meshit retinde saqtap qalý máselesi qarastyrylyp keldi. Musylmandar dinı basqarmasy meshitti qaıta jańǵyrta almady», - dedi Erlan Qalmaqov agenttik tilshisine.
Turǵyndar arasynda meshittiń buzylýy múmkin ekeni aıtylǵany ras. Bul másele kóktemde oblys ákiminiń esep berý kezdesýinde de kóterildi.
«Oblys turǵyndary bul ǵımaratty meshit qana emes, jalpy tarıhı oryn retinde saqtap qalý týraly másele qozǵady. Endi biz bul nysandy jergilikti atqarýshy organnyń balansyna ótkizemiz. Aldaǵy ýaqytta qalpyna keltirý jumystaryna jumsalatyn shyǵyn esepteletin bolady. Jóndeýge ketetin qarjy qaıdan alynatynyn ázirge aıta almaımyz», - dedi basqarma basshysy.
Sonymen, Aqmeshit oblystyń tarıhı-ólketaný mýzeıiniń ballansyna ótti. Endi ǵımarattyń jobalyq-smetalyq qujattary jasalmaq.
Muftyat.kz saıtynyń málimetine súıensek, meshit aýmaǵy 844,3 sharshy metrge teń. Bir kúmbezdi, bir munaraly, al kúmbeziniń bıiktigi - 18,890 metr, munarasynyń bıiktigi - 22,745 metr. Meshit 1000 adamǵa arnalǵan.
Foto: kst-museum.kz
