Qostanaıdaǵy ǵasyrdan astam tarıhy bar Maral ıshan meshiti qaıta jóndeledi
Oblystyq mádenıet basqarmasynyń basshysy Erlan Qalmaqovtyń aıtýynsha, el arasynda Aqmeshit atalyp ketken meshit ótken jyldyń tamyz aıyna deıin Qazaqstan musylmandary dinı basqarmasynyń birliginde bolǵan.
«Aqmeshit ǵımaraty «Tarıhı sáýlet eskertkishteri» men «Qasıetti Qazaqstan» jobalarynyń tizimine engen. Qazir meshit ǵımaratyna restavratsııalyq jumystar júrgizetin ǵylymı-jobalyq qujat daıyn. Jaqynda oblystyq bıýdjetten 200 mln teńge qarjy bólý týraly usynysymyz maquldandy. Endi respýblıkanyń tájirıbeli sáýletshilerine memlekettik satyp alý boıynsha tapsyrys berip, ǵımaratty qaıta jańǵyrtamyz. Basty maqsat - meshit ǵımaratynyń bastapqy keıpin qalpyna keltirý», - dedi basqarma basshysy.
Al, meshittiń qandaı maqsatta qyzmet etetini áli sheshimin tapqan joq.
«Mamandarymyz Orynbor qalasyndaǵy arhıvten Aqmeshittiń burynǵy sýretterin, qurylys jobasynyń syzbalaryn tapty. Bul qujatta meshit kúmbezi qazirgisinen úsh metr bıik. Biz muny da qalpyna keltiremiz. Al endi Aqmeshit bolashaqta qandaı maqsatqa qyzmet etedi degen másele qazirshe tolyq sheshilgen joq. Bul másele meshit ǵımaratyna qaıta jóndeý jumystary tolyq aıaqtalǵan soń belgili bolady», - dedi Erlan Qalmaqov.
Al oblys ákimi Arhımed Muhambetov Maral ıshan meshiti dinı nysan bolyp qalatynyn aıtqan bolatyn. https://kaz.inform.kz/news/kostanaydagy-akmeshit-dini-nysan-bolyp-kalady-arhimed-muhambetov_a3400526
Meshit byltyr tarıhı-ólketaný mýzeıine berilgen bolatyn.
Aıta ketsek, Maral Ishan meshiti tarıhyn HІH ǵasyrdan bastaıtyn kóne meshitterdiń biri. Burynǵy aty - Aqmeshit. 1879 jyly Tobyl ózeni jaǵasynan boı kótergen Qostanaıda bas-aıaǵy bes-alty jyl ishinde óndiris oryndary ashylyp, jan-jaqtan el jınaldy. Birte-birte óse kele, aımaq ortalyǵyna aınaldy. Qalaǵa musylmandar kóptep ornyǵýyna oraı ımandylyqty nasıhattaıtyn meshit máselesi qolǵa alyna bastady. Din úıi jergilikti halyqtyń qarjysyna, asar ádisimen salyndy.
Ekinshi Dúnıejúzilik soǵys jyldarynda onda evakýatsııalyq pýnkt ornalasty. Soǵystan keıingi jyldary kınoteatr, 1980-1991 jyldary fılarmonııa jaıǵasty. 1991 jylǵy 1 qarashada meshit halyqqa qaıtaryldy. Sol jyly 70 jyl úzilisten keıin alǵash ret Qurban aıt namazy oqyldy. 2002 jyly meshitke ǵulama Maral ıshan Qurmanulynyń esimi berildi.
