Qostanaıdaǵy Gagarın kóshesiniń ataýy ózgeredi
QOSTANAI. QazAqparat – Qostanaı qalasyndaǵy Gagarın kóshesiniń ataýy ózgerýi múmkin. Osy máselege qatysty qalalyq ákimdikte qoǵamdyq tyńdaý ótti, dep habarlaıdy QazAqparat tilshisi.
Qoǵamdyq tyńdaýda bastamashyl toptyń ókilderi baıandama jasady. Avtomobıl transporty kolledjiniń tehnıkalyq bóliminiń basshysy Vladımır Zakalıýjnyıdyń sózinshe, pedagogtar men stýdentter qaladaǵy Gagarın kóshesin QR Tuńǵysh Prezıdent atyndaǵy dańǵylǵa aınaldyrý jóninde ujymdyq hat jazǵan.
«QR Prezıdenti Q.Toqaev Tuńǵysh Prezıdentimiz N.Nazarbaevtyń esimin oblys ortalyqtaryndaǵy kóshelerdiń birine berý týraly bastama kóterdi. Bizdiń ujym muny biraýyzdan qoldady. Elbasynyń strategııalyq bastamalarynyń arqasynda Qazaqstan ıntegratsııalyq úderisterdiń basty lokomotıvine aınaldy. Respýblıkamyz iri jáne bedeldi halyqaralyq uıymdardyń belsendi qatysýshysy sanalady. Nursultan Nazarbaev ekonomıkany qajetti eńbek resýrstarymen qamtamasyz etý máselesinde tehnıkalyq jáne kásiptik bilim berýdi damytýǵa erekshe mán berdi. Bizdiń kolledj Gagarın kóshesinde ornalasqan. ıÝrıı Gagarın – ǵaryshqa ushqan alǵashqy adam. Álemdegi alǵashqy ǵaryshkerdiń aty umytylmaıdy. Alaıda, Elbasynyń eńbegi laıyqty baǵasyn alýy tıis», – dedi Vladımır Zakalıýjnyı.
Kolledjdiń usynysyn «AgromashHoldıng» kásipornynyń dırektory Sergeı Mogılatov ta ilip áketti.
- Qoǵamdyq tyńdaýda el pikiri, usynystary talqyǵa túsedi. Sol sebepti, qazirgi Gagarın kóshesiniń boıynda ornalasqan bizdiń kásiporyn ujymy kolledjdiń bastamasyn qoldaıdy. Óıtkeni, 1982 Nursultan Nazarbaevtyń bastamasy arqyly Qostanaı dızel zaýyty ashyldy. Sodan bastap, óńirde mashına qurastyrý salasy qaryshtap damydy. Bıyl munda 24 myń avtokólik shyǵarylady, - dedi kásiporyn dırektory.
Bastamashyl top ıÝrıı Gagarın esimin Gvardeıskıı kóshesine kóshirý týraly máseleni mańyzdy dep esepteıdi. Máslıhat depýtattary bul usynysty tolyǵymen qoldady. Al Gagarın kóshesin QR Tuńǵysh Prezıdent atyndaǵy dańǵylǵa aınaldyrý usynysy respýblıkalyq onomastıkalyq komıssııada qaralatyn boldy.
