Qostanaıdaǵy bas dáriger ólimi: Sot sheshimi ózgerdi
QOSTANAI. QazAqparat - Búgin Qostanaı oblystyq sotynyń appelıatsııalyq alqasy psıhdıspanserdiń burynǵy bas dárigeri Rashıda Sandybaevanyń ólimine qatysty istiń úkimin ózgertti, dep habarlaıdy «QazAqparat» HAA tilshisi.
Eske salsaq, osy iske baılanysty júrgizilgen memlekettik aıyptaý jumystarynyń qorytyndysy boıynsha prokýrorlar Záýresh Izaldınaǵa 25 jyl bas bostandyǵynan aıyrý jazasyn surady. Sondaı-aq, aıyptaýshy tarap jaryssóz kezinde Rýslan Ǵafarovqa múlkin tárkileı otyryp 25 jyl, Bolat Kıtebaevqa - 24 jyl, Vıktor Kodatenkoǵa 15 jyl bas bostandyǵynan aıyrý jazasyn taǵaıyndaýdy aıtqan.
«Sot alqasy 2018 jylǵy 17 qańtardaǵy úkimge baılanysty ózgeris engizdi. Sottalǵan Izaldına, Gafarov, Kıtebaeva jáne Kodatenkonyń úkimindegi «Múlkin tárkileý» jazasy alynyp tastaldy», - delingen sot taratqan baspasóz habarlamasynda.
Aıta keteıik, Izaldına oblystyq psıhıatrııalyq aýrýhananyń burynǵy bas dárigeri Rashıda Sandybaevanyń ólimin uıymdastyrýǵa qatysty aıyptalǵan bolatyn. Sonymen qatar, Izaldına, Gafarov, Kodatenko, Kıtebaev «Іri kólemdegi alaıaqtyq», «Turǵyn úıge zańsyz kirip, aldyn ala sóz baılasý arqyly asa iri kólemde urlyq jasaýdy uıymdastyrý», «Aldyn ala sóz baılasý arqyly tulǵalar tobymen eki jáne odan da kóp adamdy óltirýdi uıymdastyrý», «Aldyn ala sóz baılasý arqyly kisi ólimin uıymdastyrý» sekildi birneshe baptar boıynsha bas bostandyǵynan aıyryldy.
