Qostanaıdaǵy bankrotqa ushyraǵan qus fabrıkasy qaıta jandanady

QOSTANAI. QazAqparat -  Qostanaıdaǵy «Komsomol qus fabrıkasy» kásipornynyń jumysy 2018 jyly qaıta jandanady. Bul týraly «Shańyraq» kompanııalar toby» JShS baqylaý keńesiniń múshesi Hamıt Aqmıev málim etti, dep habarlaıdy QazAqparat tilshisi.

Oblys ákimi Arhımed Muhambetovtiń aıtýynsha, ındýstrııalandyrý kartasynyń ekinshi besjyldyǵyna 16 ınvestıtsııalyq joba endi. Investıtsııalardyń jalpy kólemi - 322 mlrd teńge, osy jobalardy júzege asyrý arqyly 3,2 myń jumys orny ashylady.

«Údemeli ındýstrııalyq-ınnovatsııalyq damý baǵdarlamasynyń birinshi bes jyldyǵynan birneshe problemaly jobaǵa ınvestorlar tabyldy. Sonyń biri «Komsomol qus fabrıkasy» AQ bolatyn. Endi «Shańyraq» kompanııalar toby» JShS qoldaýymen fabrıkany qaıta jandandyrý kózdelip otyr. Biz bul týraly «Qazagrofınans» AQ-men ýaǵdalastyqqa qol jetkizdik», - dedi oblys ákimi.

«Komsomol qus fabrıkasy» AQ-nyń jumysy 2013 jyly turalap qalǵan edi. Al 2017 jyly ol bankrotqa ushyrady. Qus fabrıkasynyń Qarabalyq aýdany ákimdigi men «Qazagrofınans» AQ aldyndaǵy qaryzy 3 mlrd teńgege deıin jetken.

«Qazagrofınans» AQ bul jobany iske asyrýdy 2009 jyly qolǵa alǵan. Rasyn aıtý kerek, sol kezde ınvestjoba eshqandaı paıda ákelmedi. Búginde fabrıkanyń barlyq máseleleri sheshildi. 2018 jyldyń qarasha aıynda joba qaıta jandanady», - deıdi «Shańyraq» kompanııalar toby» JShS baqylaý keńesiniń múshesi Hamıt Aqmıev.