Qostanaıdaǵy alapat órt: zalal kelgen aǵashtardy kesý esebinen bıýdjetke 673 mln teńge tústi

QOSTANAI. QazAqparat – Byltyr Qostanaı oblysyna qarasty Áýlıekól aýdanyndaǵy alapat orman órti kezinde zalal kelgen aǵashtardy kesý esebinen bıýdjetke 673 mln teńge tústi. Bul týraly Qostanaı oblystyq prokýratýrasynan málim etti, dep habarlaıdy QazAqparat tilshisi.

«Byltyr jeltoqsan aıynan bastap oblys prokýratýrasynyń bastamasymen oblys ákimdigi jáne ýákiletti organdarmen birlesip, Áýlıekól aýdanynda órtengen ormandy ıgerýdi baqylaý jobasy iske asyrylyp keledi. Barlyq orman sharýashylyǵy mekemeleriniń resýrstaryn jumyldyrý nátıjesinde kólemi 46 myń tekshe metr orman alqabyndaǵy aǵashtar kesildi. Odan bıýdjetke 673 mln teńge tústi. Joba sheńberinde óz betinshe aǵash kesýge jol bermeý maqsatynda kesilgen orman alqabynyń ruqsat qujattarynyń sáıkestigi tekserilip otyr. Sondaı-aq, ǵaryshtyq monıtorıng jumystary júrgiziledi», - delingen quzyrly organnyń saıtynda jarııalanǵan habarlamada.

Prokýratýra málimetine saı, byltyr qyrkúıekte Áýlıekól aýdanynda bolǵan alapat orman órtinen 32 myń ga alqap joıylǵan.