Qostanaıdaǵy aqyndar aıtysynyń fınalyna shyqqandar belgili boldy
QOSTANAI. QazAqparat – Qostanaı qalasynda Beıimbet Maılınniń 125 jyldyǵyna arnalǵan «Beıimbettiń bıigi» atty respýblıkalyq aqyndar aıtysy bastaldy, dep habarlaıdy QazAqparat.
Aıtystyń ashylýynda Qostanaı oblysy ákiminiń orynbasary Marat Júndibaev sóz sóılep, oblys ákimi Arhımed Muhambetovtiń quttyqtaýyn jetkizdi. Búgingi sóz dodasynyń júrgizýshisi, QR Eńbek sińirgen qaıratkeri Júrsin Ermannyń aıtýynsha, respýblıkalyq aıtys eki kúnge sozylady. Úzdik shyqqan alty aqyn erteń ótetin fınaldyq kezeńge qatysady. Qazylar alqasynyń quramynda halyq aqyny Ásııa Berkenova, QR Jazýshylar odaǵynyń tóraǵasy Ulyqbek Esdáýlet, QR Mádenıet qaıratkeri Aqylbek Shaıahmet, aqyn, professor Amanjol Altaev, ádebıettanýshy, «Daryn» syılyǵynyń laýreaty Eldos Toqtarbaı bar.
«Aıtys – kontsert emes. Sýrypsalma aqyndar oıǵa kelgen sózdi irikpeı, halyq kútken dúnıelerdi ortaǵa salady. Bul aıtysty «Nur Otan» partııasy qoldap, Qostanaı oblysy ákimdigi uıymdastyryp otyr. Tól ónerimizdiń partııa qamqorlyǵyna alynǵanyn aıta ketý kerek. Búgingi sóz báıgesi qazaq ádebıetiniń báıteregi Beıimbet Maılınge arnalyp otyr. Qazaqtyń úsh báıtereginiń qaısysy bolsa da, ulty úshin aıanbaı eńbek etti, sol úshin qııanat kórdi. Solardyń biri – Bı-aǵań qazaq ómiriniń sýretin jasap berdi. Onyń «Raýshan kommýnıst», «Shuǵanyń belgisi» syndy ómirsheń shyǵarmalary áli kúnge deıin mańyzyn joǵaltpady. Búgin de qazaqtyń rýhyn izdegen aqyndar sahnaǵa shyqqaly otyr», - dedi Júrsin Erman.
Sonymen, respýblıkalyq sóz saıysyna S.Qusanbaev (Óskemen), A. Qalıev (Arqalyq), S. Ótelbaeva (Qostanaı), Á. Erejeqyzy (Nur-Sultan), J. Juparhan (SQO), E. Dáýletuly (Aqmola obl.), Sh. Sezimhan (Almaty), M. Sultanhan (Qyzylorda), A. Bısenǵalıev (BQO), M. Іztileý, T. Ótepbaev, M. Ospanov, B. Saǵyntaev, M. Baızaqov (barlyǵy Qostanaı oblysynan) syndy aqyndar qatysty.
Aıbek Qalıev pen Meıirbek Sultanhan alǵashqy jupty qurady. Qazylar eki aqynǵa da joǵary upaı kóterip, fınalǵa joldama berdi. Sondaı-aq, aqtyq synǵa ótkenderdiń arasynda Serik Qusanbaev, Shuǵaıyp Sezimhan, Ásem Erejeqyzy, Saltanat Ótelbaeva, Toba Ótepbaev, Aınabek Beısenǵalıevter bar.
Aıta keteıik, aıtys jeńimpazyna temir tulpar tapsyrylady. Fınaldyq kezeń erteń saǵat 11.00-de bastalady.
