Qostanaıdaǵy jataqhanaǵa Ahmet Baıtursynovqa arnap mýral salyndy
QOSTANAI. KAZINFORM – Qostanaıdaǵy Allur mashınaqurylysy kesheni jataqhanasynyń qabyrǵasyna qazaqtyń uly aǵartýshysy Ahmet Baıtursynovqa arnalǵan mýral salyndy.
Zaýyttyń baspasóz qyzmetinen habarlanǵandaı, mýraldy salýdaǵy maqsat – qazaqtyń birtýar ulynyń qazaq tili men mádenıetin damytýǵa qosqan úlesin pash etý, ulttyń jandanýy jolynda qaldyrǵan izin tanytý, este saqtaý.
«Biz osy arqyly Ahmet Baıtursynovtyń eńbekterin eske alyp, onyń ult birligin qalyptastyrýǵa qosqan ólsheýsiz úlesi úshin qurmetimizdi bildirgimiz keldi. Mýralǵa áıgili ǵalymnyń «Adamǵa eń qymbat nárse – jurt qamy, jurt isi» degen sózi jazyldy. Biz sýretshilerden aǵartýshynyń tek beınesin ǵana salyp qoımaı, onyń rýhynyń bıiktigin kórsetýge de kúsh salýdy suradyq. Bul óz kezegine mýraldyń ómirsheń, áserli bolýyna yqpal etedi»,-dedi kásiporyn ókilderi.
Bul beıne jergilikti jataqhananyń kórkin keltirip qana qoımaı estelik sımvoly, maqtanysh pen qurmettiń belgisi bolady. Mýraldy Qostanaı qalasy, Promyshlennaıa kóshesi 40/A mekenjaıynan kórýge bolady.
