Qostanaıdaǵy jańa óndiristerge gaz jetkizetin qubyr salynady
ASTANA. KAZINFORM – Qazaqstanda Qostanaı oblysynda josparlanǵan iri ónerkásiptik jobalardy tabıǵı gazben qamtý úshin jańa magıstraldyq gaz qubyry salynady. Bul týraly QR Energetıka vıtse-mınıstri Qaıyrhan Tutqyshbaev málimdedi.
– Óńirdegi jańa óndiristerdi qajetti gaz kólemimen qamtamasyz etý maqsatynda «KS-14 jańa kompressorlyq stantsııasynyń qurylysy jáne «KS-14–Qostanaı» magıstraldyq gaz qubyry» jobasy iske asyrylyp jatyr, - dedi vıtse-mınıstr.
Onyń sózinshe, joba Qostanaı oblysynda josparlanǵan birqatar iri óndiristik nysannyń jumysyn qamtamasyz etýge baǵyttalǵan.
– Atap aıtsaq, gaz qubyry arqyly astyqty tereń óńdeý, glınozem óndirý jáne alıýmınıı shyǵarý, ystyq brıkettelgen temir óndirý zaýyty, sondaı-aq gaz-hımııa kesheni sııaqty jobalarǵa tabıǵı gaz jetkizý kózdelip otyr. Atalǵan joba Katar memleketimen jasalǵan Úkimetaralyq kelisim aıasynda katarlyq ınvestormen birlesip júzege asyrylatyn bolady, - dedi spıker.
Jańa gaz ınfraqurylymy Qostanaı oblysynyń ónerkásiptik áleýetin arttyryp, óńirdegi jańa óndiristerdiń iske qosylýyna múmkindik bermek.
Eske salaıyq, Qazaqstanda 2035 jylǵa deıin jańa munaı-gaz ken oryndaryn ıgerý jospary ázirlendi.
