Qostanaıdaǵy jańa KIA zaýyty jylyna 102 mln tekshe metr gazben qamtamasyz etiledi
ASTANA. Kazinform – Qostanaı oblysynda salynyp jatqan joǵary tehnologııalyq KIA avtomobıl zaýytyn jylyna 102 mln tekshe metrge deıin taýarlyq gazben qamtamasyz etý josparlanyp otyr. Bul týraly Energetıka vıtse-mınıstri Qudaıbergen Arymbek Qostanaı oblysyna jumys sapary barysynda málimdedi.
Sapar barysynda vıtse-mınıstr strategııalyq mańyzdy zaýytty taýarlyq gazben qamtamasyz etýge arnalǵan ınjenerlik ınfraqurylym qurylysynyń barysymen tanysty.
Energetıka mınıstrliginiń málimetinshe, zaýytty jobalaý kezeńinde kásiporyn respýblıkalyq uzaqmerzimdi gaz balansyna engizilip, «QazaqGaz Aimaq» AQ saǵatyna 11 700 tekshe metr gazǵa qosylý úshin tehnıkalyq sharttar bergen. Gaz tehnologııalyq protsesterde — turaqty temperatýra rejımin, joǵary energııa tıimdiligin jáne avtomobıl komponentterin sapaly boıaýdy qamtamasyz etý úshin boıaý-keptirý kameralarynda paıdalanylatyn bolady.
KIA zaýytynda dánekerleý, boıaý jáne shanaq qurastyrýdy qosa alǵanda, avtomobıl óndirisiniń tolyq tsıkli josparlanǵan. Munda Kia Sportage, Seltos, Cerato jáne basqa da tanymal modelder shyǵarylady. Zaýytty osy jyly iske qosý kózdelip otyr.
Aıta keteıik, bul joba tabıǵı gazdyń — Qazaqstannyń zamanaýı, ekologııalyq jáne básekege qabiletti ónerkásibin damytýdaǵy negizgi resýrs ekenin taǵy bir márte dáleldeıdi.
Buǵan deıin Úkimet rezervinen Qostanaı oblysynda sý tasqynyna qarsy is-sharalar úshin 1 mlrd teńge bólindi.