Qostanaıdaǵy uzaqqa sozylǵan mektep qurylysy: jumystyń qashan aıaqtalatyny belgili boldy
ASTANA. KAZINFORM — Qostanaıdaǵy «Qunaı» shaǵynaýdanynda 900 oryndyq mekteptiń qurylysy 2021 jyly bastalǵan. Alǵashqy merdiger «Grenada» kompanııasy bolǵan.
Qostanaı oblysynda mektep qurylystarynyń ne sebepti uzaqqa sozylǵany týraly buǵan deıin jazǵan edik.
2024 jylǵy qańtarda mekteptiń sport zaly shatyrynyń bir bóligi opyrylyp túsken. Osy oqıǵadan keıin ǵımarat konstrýktsııalaryn tekserý, qalpyna keltirý jumystaryn júrgizý jáne jobalyq-smetalyq qujattamany túzetý qajet bolǵan.
Qurylystyń uzaqqa sozylýy turǵyndardyń narazylyǵyn týdyrdy. Áleýmettik jelide qala turǵyndary birneshe jyldan beri ýáde etilgen mekteptiń áli kúnge deıin aıaqtalmaǵanyna kóńili tolmaıtynyn jazdy. Osy máselege qatysty jıyndar men ýákiletti organdar ókilderimen kezdesýler de ótkizilgen.
Buǵan deıin Qurylys basqarmasy nysannyń daıyndyq deńgeıi shamamen 75 paıyz ekenin habarlaǵan. Qurylysty aıaqtaý jumystary jańa merdiger — «KazElıtStroı 2050» JShS-ne tapsyrylǵan. Kelisimshart somasy 247 mıllıon teńgeni quraǵan, onyń 203,9 mıllıon teńgesi ıgerilgen.
Alaıda qurylysty aıaqtaý úshin ǵımarat konstrýktsııalarynyń jaı-kúıine qatysty máseleni sheshý qajet.
— Tehnıkalyq qorytyndyǵa sáıkes, mektepti paıdalanýǵa berý úshin ǵımarat konstrýktsııalaryn kúsheıtý jobasy ázirlenip jatyr. Jobalyq sheshimder memlekettik saraptamadan oń qorytyndy alǵannan keıin tıisti jumystar júrgizilip, nysandy paıdalanýǵa berý sharalary qabyldanady, — dep habarlady Qostanaı oblysynyń Qurylys basqarmasy.
Buǵan deıin Qostanaı oblysyndaǵy mektepte quny 50 mln teńgeden asatyn satyp alý zańsyz júrgizilgenin jazǵan edik.
