Qostanaıdaǵy saıajaılardyń taǵdyry ne bolmaq: Bas jospardaǵy ózgerister belgili boldy
ASTANA. KAZINFORM — Qostanaıda kóptegen baý-baqsha seriktestikteriniń aýmaǵyn bolashaq turǵyn úı qurylysyna arnalǵan rezervtik aımaqqa aınaldyrý usynyldy. Ózgerister qalanyń 2050 jylǵa deıingi bas josparyn túzetý aıasynda qarastyrylyp jatyr, dep habarlaıdy Kazinform agenttiginiń tilshisi.
Qazir qalada 22 baý-baqsha seriktestigi bar, onyń 18-i jumys istep tur.
Qoldanystaǵy bas jospar boıynsha, jeti seriktestik aýmaǵy maýsymdyq turǵyn úı aımaǵyna, segizi bolashaq turǵyn úı qurylysyna arnalǵan rezervke, al ekeýi demalys aımaǵyna jatqyzylǵan.
«ıÝbıleınyı» óndiristik kooperatıviniń jaǵdaıy bólek. Onyń aýmaǵy kópqabatty turǵyn úı qurylysy aımaǵyna engizilgen. «ıÝbıleınyı-2» shaǵynaýdanynyń egjeı-tegjeıli josparlaý jobasy ázirlenip, memlekettik saraptamadan ótip, bekitilgen. Qazir jobany iske asyrý bastalǵan.
Bas jospardy túzetý kezinde ázirleýshiler baý-baqsha seriktestikteriniń aýmaqtaryn 2050 jylǵa deıingi kezeńde turǵyn úı salýǵa arnalǵan qala qurylysy rezervine aýystyrýdy usynyp otyr.
Bul ózgerister «ıÝbıleınyı» kooperatıvine jáne demalys aımaqtarynda ornalasqan eki baý-baqsha seriktestigine qatysty bolmaıdy. Sońǵy ekeýiniń qoldanystaǵy fýnktsıonaldyq aımaqtarǵa bóliný tártibin saqtaý usynylǵan.
Sonymen qatar bas jospardy ázirleýshiler fýnktsıonaldyq aımaqtardyń ózgerýi jer ýchaskelerin avtomatty túrde alyp qoıýdy bildirmeıtinin atap ótti.
Jer ıeleriniń menshik jáne jer paıdalaný quqyqtary, sondaı-aq quqyq belgileıtin qujattarda kórsetilgen jer ýchaskeleriniń nysanaly maqsaty saqtalady. Turǵyndar óz múlkin burynǵy maqsaty boıynsha paıdalana alady.
Jerdi memlekettik qajettilik úshin alyp qoıý — jeke rásim. Bas jospar kezeń-kezeńimen iske asyrylady, al naqty aýmaqtarǵa qatysty sheshimder egjeı-tegjeıli josparlaý jobalary aıasynda qabyldanady.
Buǵan deıin Qostanaıda Joǵary aýdıtorlyq palata jerdi óz betinshe basyp alýǵa qatysty 170-ten astam derekti anyqtaǵan bolatyn.
