Qostanaıdaǵy saýda ortalyǵynda 11 eńbek mıgranty qujatsyz jumys istegen

ASTANA. KAZINFORM — Qostanaı qalasyndaǵy saýda-oıyn-saýyq ortalyqtarynyń birinde kóshi-qon zańnamasynyń buzylǵany anyqtaldy, dep habarlaıdy Kazinform tilshisi.

Polıtsııanyń málimetinshe, qaladaǵy saýda-oıyn-saýyq ortalyqtarynyń birinde kóshi-qon qyzmetiniń qyzmetkerleri ýchaskelik ınspektorlarmen birlesip tekserý júrgizý barysynda 11 sheteldik azamattyń kommertsııalyq nysanda tıisti ruqsat qujattarynsyz montaj jumystaryn atqaryp júrgenin anyqtaǵan.

— Barlyq eńbek mıgranttary odan ári tekserý júrgizý úshin polıtsııa basqarmasyna jetkizildi. Qazaqstan Respýblıkasynyń kóshi-qon zańnamasyn buzǵany úshin olar jaýapkershilikke tartylady. Jaqyn ýaqytta sot olardyń el aýmaǵynan shyǵarý máselesin qaraıdy, — delingen habarlamada.

Atalǵan sheteldik azamattardyń oblys ortalyǵyna kelgennen keıin birneshe kún ishinde anyqtalǵany atap ótildi.

Sondaı-aq, sheteldik jumys kúshin jergilikti atqarýshy organnyń ruqsatynsyz paıdalanǵany úshin jumys berýshi de ákimshilik jaýapkershilikke tartyldy.

Kóshi-qon qyzmeti basqarmasynyń bastyǵy Qaırat Dútpaevtyń aıtýynsha, jyl basynan beri Qostanaı oblysynda kóshi-qon zańnamasyn buzýdyń 1,5 myńnan astam deregi tirkelgen.

Osyǵan deıin Májilis depýtaty Erlan Barlybaev Premer-mınıstr Oljas Bektenovtiń atyna saýal joldap, eńbek mıgranttaryna qosymsha salyq salý týraly usynys aıtty.