Qostanaıdaǵy oqý oryndaryna shabýyl jasalatyny týraly habarlamalardy polıtsııa tekserip jatyr
ASTANA. KAZINFORM — Qostanaı oblysynyń polıtsııasy qaladaǵy bilim berý uıymdaryna qaýip tóndiretin habarlamalardyń Telegram-da taralýyna baılanysty sotqa deıingi tergeý júrgizip jatyr.
4 qazan kúni keshke Qostanaı qalasynyń turǵyny polıtsııaǵa júgindi. Onyń jergilikti joǵary oqý oryndarynyń birinde oqıtyn qyzy áleýmettik jeliden belgisiz avtordyń jazbasyn kórgen. Úreı týdyrǵan habarlamada oqý oryndaryna shabýyl jasalatyny aıtylyp, bul árekettiń 7 qazanda bolýy múmkin ekeni kórsetilgen.
Jazbalarda qarý-jaraqtyń sýretteri de jarııalanyp, habarlamalardy ári qaraı taratýǵa shaqyrǵan úndeý bolǵan. Polıtsııa atalǵan aqparatty jedel tekserip shyqty.
Qostanaı oblysynyń Polıtsııa departamenti habarlaǵandaı, qyzmetkerler jazbalarda atalǵan barlyq ǵımaratty qarap shyqqan. Tekserý barysynda jarylǵysh zattar men qurylǵylar, sondaı-aq kúdik týdyratyn ózge de buıymdar tabylǵan joq.
— Túsken málimet dereý tekserilip, jazbada atalǵan barlyq ǵımarat qaraldy. Jarylǵysh zattar men qurylǵylar, sondaı-aq basqa da kúdikti buıymdar tabylǵan joq. Qazir jarııalanym avtory men oqıǵanyń mán-jaıy anyqtalyp jatyr, — dep habarlady Qostanaı oblysynyń Polıtsııa departamenti.
Habarlamalardyń taralýyna baılanysty polıtsııa sotqa deıingi tergeýdi bastady. Qazir quqyq qorǵaý organdary jazbalardyń avtoryn anyqtap, oqıǵanyń mán-jaıyn zerdelep jatyr.
Qostanaı oblysynyń Bilim basqarmasy qaladaǵy mektepter men kolledjderde oqý protsesi qalypty jaǵdaıda jalǵasyp jatqanyn habarlady.
— Polıtsııa departamenti turǵyndardy sabyr saqtap, dúrbeleńge jol bermeýge jáne jalǵan aqparat taratpaýǵa shaqyrady. Kórineý jalǵan málimet taratqany úshin qylmystyq jaýapkershilik kózdelgen. Tek resmı aqparatqa senýdi suraımyz, — dep habarlady vedomstvo.
Buǵan deıin Qostanaıda terrorızmge qatysty jalǵan habarlama taratqan jasóspirim sottalǵan edi.
