Qostanaıda oblystyq aýrýhanany jóndeý kezinde 141 mln teńgeniń jabdyǵy urlandy

— Bas dárigerdiń ótinishi boıynsha oblystyq aýrýhananyń № 3 korpýsyn kúrdeli jóndeý barysynda medıtsınalyq jabdyqty urlaý deregi negizinde qylmystyq is qozǵaldy, — dep habarlady qadaǵalaý organy.

Densaýlyq saqtaý basqarmasynyń naqtylaýynsha, oblystyq aýrýhananyń bir korpýsyn kúrdeli jóndeý jobasynyń jalpy quny 1 mlrd 33,5 mln teńge, onyń 496,5 mln teńgesi ıgerilgen.

Qazirgi ýaqytta qurylys-montaj jumystary toqtatylǵan, nysan tolyq aıaqtalmaǵan. Ǵımarattyń daıyndyq deńgeıi memlekettik saraptamanyń qorytyndysynan keıin anyqtalady.

Basqarma málimetinshe, jobaǵa túzetýler engizilgen, qujattama qazir memlekettik saraptamadan ótip jatyr.

Vedomstvo málimetinshe, 2025 jyldyń 1 naýryzynda bastalýy tıis jumystarǵa merdiger kirispegen. Sol kezde uıym jumys qunyn arttyrýdy jáne kelisimshart merzimin uzartýdy talap etkeni aıtylǵan. Keıin merdiger sotqa júginip, kelisimshartqa ózgeris engizýdi, ıaǵnı jumys qunyn jáne oryndaý merzimin ulǵaıtýdy mindetteý týraly talap qoıǵan. Buǵan sebep retinde jobalyq-smetalyq qujattamanyń 2025 jylǵy 15 mamyrda jaramdylyq merziminiń aıaqtalýy kórsetilgen.

Sotta medıatsııalyq kelisim jasaldy: merdiger jumys qunyn kóterý talabynan bas tartty, al jumys merzimi 1 qazan 2025 jylǵa deıin uzartyldy. Alaıda densaýlyq saqtaý basqarmasynyń málimetinshe, merdiger uıym óz mindettemelerin is júzinde oryndamaǵan. Nysanda aýysymyna nebári 2–4 adam ǵana jumys istegen, al aýrýhananyń aýyzsha jáne jazbasha eskertýlerine jaýap berilmegen. Belgilengen merzimge deıin, ıaǵnı 1 qazan 2025 jylǵa deıin nysan tapsyrylmaǵan.

2025 jylǵy 2 qazanda aýrýhana nysannyń ýaqytynda tapsyrylmaýyna baılanysty kelisimshartty merziminen buryn buzý týraly habarlama joldaǵan. Byltyr 26 qarasha kúni kelisimshart memlekettik satyp alý portalynda tıisinshe oryndalmaǵandyqtan buzylǵan. Merdiger bul sheshimmen kelispeı, kelisimshart merzimin uzartý jáne buzýdy zańsyz dep taný týraly sotqa talap qoıǵan. Alaıda Qostanaı oblystyq sotynyń 2026 jylǵy 31 naýryzdaǵy sheshimimen kelisimshartty uzartýdan bas tartylyp, buzý zańdy dep tanylǵan.

Basqarma sondaı-aq 2025 jylǵy 13 qarashada oblystyq máslıhat, densaýlyq saqtaý basqarmasy jáne aýrýhana ákimshiligi ókilderinen quralǵan komıssııa nysandaǵy jylý júıesiniń qysqy maýsymǵa daıyndyǵyn teksergenin habarlady. Tekserý kezinde ǵımarattyń esikteri ashyq bolǵan, merdigerdiń kúzeti bolmaǵan, bul akti men kelisimshart talaptaryna sáıkes qamtamasyz etilýi tıis edi.

Tekserý barysynda komıssııa buryn satyp alynǵan, ornatylǵan jáne aqshasy tólengen medıtsınalyq arnaıy jabdyqtyń bólshektelgenin anyqtaǵan. Osydan keıin aýrýhana ákimshiligi merdigerge nysanǵa kelý týraly talap pen eskertý joldaǵan, alaıda ol kelmedi.

Anyqtalǵan faktiden keıin densaýlyq saqtaý basqarmasy oblys ákimdigine aýdıt júrgizý týraly suranys joldaǵan. Ákimdik nysandaǵy oryndalǵan jumystar men jabdyqtardyń sáıkestigine aýdıt júrgizýdi tapsyrǵan. Merdigerge aýdıt týraly habarlanǵanymen, onyń ókili tekserýge qatyspaǵan.

Basqarma málimetinshe, aýdıt tehnıkalyq qadaǵalaý ókilimen birge júrgizilgen. Nátıjesinde 2024 jyldan 2025 jylǵy 6 naýryzǵa deıingi oryndalǵan jumystar aktileri boıynsha buryn ornatylǵan jáne aýrýhana tólegen jabdyqtyń jetispeıtini anyqtalǵan. Jetispeıtin soma — 141 mln 194,1 myń teńge.

Densaýlyq saqtaý basqarmasynyń málimetinshe, aýrýhana ótinishi negizinde Qostanaı qalasy polıtsııa basqarmasynyń tergeý bólimi «asa iri kólemdegi urlyq» baby boıynsha qylmystyq is qozǵaǵan.

Qazirgi ýaqytta barlyq medıtsınalyq manıpýlıatsııalar jergilikti perınataldyq ortalyqta júrgizilip otyr. Nysan iske qosylǵannan keıin onda gınekologııa, jaq-bet hırýrgııasy jáne otorınolarıngologııa bólimshelerin ornalastyrý josparlanǵan. Qurylys-montaj jumystaryn aıaqtaý jáne nysandy paıdalanýǵa berý 2026–2027 jyldarǵa josparlanyp otyr.

Taǵy bir kúrdeli joba — balalar oblystyq aýrýhanasyn jóndeý. Joba 2021 jyldan beri sozylyp keledi. Buǵan merdiger uıym men oblystyq densaýlyq saqtaý basqarmasy arasyndaǵy sot daýlary sebep bolǵan: 2023 jyly kelisimshart azamattyq tártipte buzylǵan. 2024 jyldyń aqpanynda jóndeýdi aıaqtaýǵa qosymsha 1,5 mlrd teńge suralǵan, bul somaǵa basqarma basshysynyń aıtýynsha, ınjenerlik jelilerdi qosý jumystary jáne basqa da shyǵyndar kiredi.

Qarasha aıynda Densaýlyq saqtaý mınıstri Aqmaral Álnazarova bul uzaqqa sozylǵan jóndeý týraly pikir bildirdi.

Densaýlyq saqtaý basqarmasynyń málimetinshe, qazir jobalyq-smetalyq qujattama memlekettik saraptamada qaralyp otyr. Qorytyndy maýsymnyń ekinshi onkúndigine josparlanǵan. Basqarma qazirgi tańda nysandardy odan ári keshiktirý qaýpi joq ekenin habarlady.

Oblystyq densaýlyq saqtaý basqarmasynyń málimetinshe, ǵımaratty kúrdeli jóndeý 2021 jyldyń 27 shildesinde «Tabys Plıýs» kompanııalar toby ázirlegen jobalyq-smetalyq qujattama negizinde bastalǵan. Jobanyń jalpy quny 1,2 mlrd teńgeni qurady.

Bastapqyda qurylys-montaj jumystary 2021 jyldyń qańtarynda aıaqtalýy tıis bolǵan, alaıda merzim keıinge shegerilgen.

— Qurylys merzimi obektiniń tolyq berilmeýine baılanysty bir ret uzartyldy. 2021 jylǵy 2 sáýirdegi sot uıǵarymy men bitimgershilik kelisim negizinde 13 sáýirde qosymsha kelisim jasalyp, sharttyń oryndalý merzimi 2021 jyldyń 1 tamyzyna deıin uzartyldy, — dep habarlady vedomstvo.

Sondaı-aq basqarma jóndeý jumystary kezinde jobalyq-smetalyq qujattamaǵa túzetýler engizilmegenin atap ótti. Alaıda keıinnen «Vershına» atty ekinshi merdiger uıym jumystardy jalǵastyrýdan bas tartqan.

— Jumys toqtatylǵan sátte merdiger ózgergen koeffıtsıentterdi (2021–2022 jyldar) eskere otyryp jáne smetalyq qunnyń 10 paıyzdan astam qymbattaýyna baılanysty jobalyq-smetalyq qujattamaǵa túzetý engizýdi talap etti, — delingen basqarma jaýabynda.

Jóndeý kezeńinde nysanǵa qosymsha qarjy bólinbegen.

Sonymen qatar sot arqyly merdigerden 100 mln teńgege jýyq qarajat óndirilgen. Qostanaı oblysynyń mamandandyrylǵan aýdanaralyq ekonomıkalyq sotynyń sheshimimen:

● 68,8 mln teńge — ıgerilmegen avans;

● 21,8 mln teńge — kommýnaldyq shyǵyndar;

● 2,7 mln teńge — sot shyǵyndary óndirilgen.

Budan bólek, merdiger uıymmen jasalǵan kelisimshart buzylǵan.

Joba toqtatylǵannan keıin oblystyq balalar aýrýhanasynyń ǵımaraty Qostanaı oblysy ákimdiginiń qurylys, sáýlet jáne qala qurylysy basqarmasynyń balansyna berilgen. Qazir ákimdik ony kúrdeli jóndeý emes, qaıta jańǵyrtý (rekonstrýktsııa) retinde iske asyrýdy josparlap otyr.

Basqarma dereginshe, 2024 jyldyń jeltoqsanynda «Stron-Holdıng» JShS jańa jobalyq-smetalyq qujattamany ázirleýge kirisken.

Qazirgi ýaqytta qujattama daıyn, memlekettik saraptamadan ótip jatyr.

— Qazirgi tańda JSQ ázirleý aıaqtaldy, qujattama memlekettik saraptamada qaralýda. JSQ bekitý tek oń qorytyndy alynǵannan keıin júzege asyrylady, — dedi oblystyq qurylys, sáýlet jáne qala qurylysy basqarmasy basshysynyń mindetin atqarýshy Danııar Qanapın.

Jobanyń naqty quny ázirge belgisiz, ol tek saraptama aıaqtalǵannan keıin anyqtalady. Odan keıin merdiger uıymdy anyqtaý úshin memlekettik satyp alýlar júrgiziledi.

Osylaısha, balalar oblystyq aýrýhanasyn kúrdeli jóndeý bastalǵannan keıin birneshe jyl ótse de, joba qaıtadan jobalyq qujattama daıyndaý satysynda tur, al qurylys jumystary men onyń aıaqtalý merzimi ázirge belgisiz.

Aıta keteıik, elordada jyl basynan beri qurylys salasynda 160 mln teńgeden astam aıyppul salynǵan.