Qostanaıdaǵy mektepten týberkýlez shyqty degen habarlamadan keıin tergeý bastaldy
ASTANA. KAZINFORM — Mektep qazirdiń ózinde dezınfektsııalandy, naýqaspen baılanysta bolǵandar tekserildi. Qazir sanıtarııalyq-epıdemıologııalyq sharalar jalǵasyp jatyr.
Bilim berý bóliminiń málimetine sáıkes, Meńdiqara aýdanyndaǵy Ǵabbas Jumabaev atyndaǵy Borovsk mektep-gımnazııasynda azyq-túlik jetkizýshisimen eńbek qatynasy joq adamǵa mektep ashanasyna kirýge ruqsat bergen bolýy múmkin degen habarlamalardan keıin tergeý bastaldy.
— Mektepte mundaı adamnyń bolýy shynymen anyqtaldy, biraq azyq-túlik jetkizýshisi kez kelgen buzýshylyqty joqqa shyǵarady. Kelisimniń sharttaryn saqtamaǵany úshin jetkizýshige shaǵym túsirildi, — delingen habarlamada.
Belgili bolǵandaı, qyzmetker birneshe jyl buryn týberkýlezden emdelgen jáne únemi baqylaýda bolǵan. Qazirgi ýaqytta onyń densaýlyq jaǵdaıy qosymsha baǵalanyp jatyr.
Mektep óz úı-jaılaryn dezınfektsııalaýdy qosa alǵanda, birqatar aldyn alý sharasyn júzege asyrýda. Sondaı-aq, sanıtarııalyq-epıdemıologııalyq tekserý jáne zerthanalyq tekserýler josparlanǵan.
Buǵan deıin oqýshylardyń ata-analarymen kezdesý ótti. Bilim berý bóliminiń, ortalyq aýdandyq aýrýhananyń jáne aýdandyq sanıtarııalyq-epıdemıologııalyq baqylaý bóliminiń ókilderi qatysty. Ata-analarǵa jaǵdaı túsindirilip, olardyń suraqtaryna jaýap berildi.
Sanıtarııalyq-epıdemıologııalyq qyzmet departamenti zańǵa sáıkes, naqty naýqas týraly aqparat, onyń ishinde dıagnozy men aýrý túri jarııa etilmeıtinin málimdedi.
— Sanıtarııalyq-epıdemıologııalyq qyzmet mamandary oqıǵa tirkelgen jerde epıdemıologııalyq tergeýdi jalǵastyryp jatyr. Baılanystaǵy adamdar anyqtaldy, olardyń medıtsınalyq tekserýleri uıymdastyryldy. Ulttyq sanıtarııalyq-epıdemıologııalyq saraptama ortalyǵynyń qyzmetkerleri mekteptiń barlyq aýmaǵyn dezınfektsııalady, — dedi asa qaýipti ınfektsııalar men týberkýlezdi baqylaý bóliminiń basshysy Ásel Baımuhametova.
Bolashaqta mindetti sanıtarııalyq-profılaktıkalyq usynystar beriledi. Jaǵdaıdy sanıtarııalyq-epıdemıologııalyq qyzmet jáne medıtsınalyq uıymdar baqylap otyr.
Osyǵan deıin Qazaqstanda týberkýlezden bolatyn ólim-jitim bes ese azaıǵanyn jazǵanbyz.