Qostanaıdaǵy máselelerdi JI arqyly baqylaý tájirıbesi qolǵa alyna bastady
ASTANA. KAZINFORM – Qostanaıda qalalyq ınfraqurylymdy baqylaý jáne ondaǵy máselelerdi jedel anyqtaý úshin jasandy ıntellekt tehnologııalary synaqtan ótkizilip jatyr. Jańa tsıfrlyq sheshimder qalalyq qyzmetterdiń jumys tıimdiligin arttyrýǵa baǵyttalǵan. Bul týraly Kazinform tilshisi habarlaıdy.
Bul týraly iKomek-109 ahýaldyq ortalyǵynyń 2026 jyldyń toǵyz aıyndaǵy jumys qorytyndylaryn tanystyrý barysynda belgili boldy.
Baıandamada aıtylǵandaı, qazir Qostanaıda qalany basqarýǵa arnalǵan tsıfrlyq panel jańǵyrtylyp jatyr. Júıe qalalyq sharýashylyqtyń túrli baǵyttaryn baqylaýǵa arnalǵan quraldardy biriktiredi.
Atap aıtqanda, qar polıgonyndaǵy avtotarazy derekteri júıege engizilgen. Bul kólik quraldarynyń aýmaqqa kirgenin tirkeýge jáne shyǵarylǵan qar týraly aqparatty júıeleýge múmkindik beredi.
Sondaı-aq qatty turmystyq qaldyqtar men iri kólemdi qoqystardy shyǵarý barysyn baqylaý modýlderi jetildirilip jatyr.
Kóshelerdi jaryqtandyrýǵa da erekshe nazar aýdarylǵan. «Aqyldy jaryqtandyrý» júıesi shamdardyń jaǵdaıyn baqylap, qalanyń ár kóshesindegi istemeı turǵan jaryq qurylǵylarynyń úlesin anyqtaýǵa múmkindik beredi.
Budan bólek, qoǵamdyq kólikti baqylaýdyń tsıfrlyq quraldary damytylyp jatyr. Olardyń qatarynda SMS BUS júıesi, baǵdarshamdardyń jumysy, qalalyq beınebaqylaý kameralary, jyly aıaldamalar men balalar oıyn alańdaryn baqylaý júıeleri bar.
Jańa baǵyttardyń biri – jasandy ıntellekt negizindegi sheshimderdi synaqtan ótkizý. Aldaǵy ýaqytta bul tehnologııalar qalalyq ınfraqurylymdaǵy máselelerdi jyldam anyqtaýǵa, monıtorıng dáldigin arttyrýǵa jáne sheshim qabyldaý úderisin jedeldetýge múmkindik beredi dep kútiledi.
Sonymen birge jasandy ıntellekttiń naqty qandaı mindetterdi atqaratyny jáne ony tolyq engizý merzimi ázirge naqtylanbaǵan.
Aıta keteıik, Energetıka mınıstrligi JI kómir qoryn esepteý ýaqytyn 10 kúnnen 20 mınýtqa qysqartqanyn jarııalady.
