Qostanaıdaǵy kásiporynda jumysshy áıel qolynan aıyryldy
ASTANA. KAZINFORM – Qostanaıdaǵy balyq óńdeý kásipornynda bolǵan aýyr óndiristik jaraqatqa qatysty tergeý jalǵasyp jatyr. Eńbek ınspektsııasy arnaıy komıssııanyń qashan qurylǵanyn jáne tergeý qalaı júrgizilip jatqanyn túsindirdi.
Óńirlik buqaralyq aqparat quraldarynyń habarlaýynsha, balyq óńdeý kásipornynyń qyzmetkeri óndiristik ettartqyshpen jumys isteý kezinde aýyr jaraqat alǵan. Saldarynan áıeldiń oń qoly tolyqtaı julynyp ketken.
Vedomstvo Kazinform agenttiginiń saýalyna bergen jaýabynda jazataıym oqıǵa týraly habarlama oblystyq eńbek ınspektsııasy departamentine 2026 jylǵy 8 mamyrda túskenin málimdedi.
Eńbek kodeksine sáıkes, qyzmetker aýyr jaraqat alǵan nemese qaza tapqan eńbek qyzmetine baılanysty oqıǵalar arnaıy tergeýge jatady.
Alaıda arnaıy komıssııa jaraqattyń aýyrlyq dárejesi týraly resmı medıtsınalyq qorytyndy alynǵannan keıin ǵana qurylady. Mundaı qorytyndy departamentke tek 28 mamyrda túsken.
Osydan keıin kelesi kúni, ıaǵnı 29 mamyrda departament basshysynyń buıryǵymen arnaıy tergeý komıssııasy quryldy. Onyń quramyna memlekettik eńbek ınspektory, jumys berýshiniń ókili jáne qyzmetkerlerdiń ókili engizilgen.
Qazirgi ýaqytta komıssııa oqıǵanyń sebepteri men mán-jaılaryn anyqtap jatyr. Tergeý aıaqtalǵan soń materıaldar zańnama talaptaryna sáıkes polıtsııa organdaryna joldanady.
Buǵan deıin Pavlodarda óndiristik jaraqattar taý-ken metallýrgııa salasynda jıi tirkeletini habarlanǵan bolatyn.
Aıta keteıik, óndiristik qaýipsizdik talaptarynyń saqtalmaýy jumysshylardyń ómiri men densaýlyǵyna eleýli qaýip tóndiredi. Sondyqtan mundaı oqıǵalar boıynsha arnaıy tergeý júrgizilip, jaýapty tulǵalardyń áreketine quqyqtyq baǵa beriledi.
