Qostanaıda soqqyǵa jyǵylǵan dáriger sotta 2 mln teńge talap etti
ASTANA. KAZINFORM — Qostanaıda oblystyq aýrýhananyń jedel járdem bólimshesiniń dárigeri Anton Kıstanovtyń soqqyǵa jyǵylýyna qatysty qylmystyq is qozǵaldy, dep habarlaıdy Kazinform tilshisi.
Esterińizge sala keteıik, 2025 jyldyń shilde aıynda Qostanaı aýrýhanasynda naýqas jedel járdem bólmesinde dárigerge shabýyl jasap, soqqyǵa jyqqan. Dáriger jansaqtaý bólimine jatqyzylyp, keıin sanıtarlyq avıatsııamen Astanaǵa jetkizildi.
Zardap shekken 34 jastaǵy ýrolog Anton Kıstanov boldy.
Kúdikti azamat ustaldy. Ol buryn sotty bolǵan 34 jastaǵy Abylaıhan Sárinjepov ekeni anyqtaldy.
Buǵan deıin búıreginde tas bar degen kúdikpen jedel járdemge jetkizilgen Sárinjepov dáriger qabyldaýyn birneshe saǵat kútken. Sotta ol 16 shildege qaraǵan túni dárigerdiń aýrýdy basatyn dáriler men tabletkalar jazyp bergenin egjeı-tegjeıli aıtyp berdi. 17 shilde kúni qatty aýyrǵan soń oblystyq aýrýhananyń qabyldaý bólimine baryp, dárigerdi uzaq kútkenin aıtyp, qyzmetkerlerdiń dóreki qarym-qatynasyna birneshe ret shaǵymdanǵan.
— Aqyrynda dáriger kelgen kezde onyń minez-qulqy tipti ózgerip ketti, ol meni jáne meniń qalamnyń dárigerlerin balaǵattady. Men ashýlanyp, ony uryp jiberdim. Men óz kinámdi moıyndaımyn jáne ókinemin, — dep jaýap berdi sottalýshy.
Soqqynyń saldary dárigerdiń densaýlyǵy úshin aýyr boldy. Jábirlenýshi jabyq bas-mı jaraqatyn alyp, bas súıegi synǵan.
Jaraqat saldarynan dáriger áli jumysyna oralmaǵan.
Zardap shekken hırýrg Anton Kıstanov 2 mıllıon teńge talap etti. Sottalýshy ótemaqy tóleýge daıyn ekenin aıtty.
Sot otyrysy jalǵasyp jatyr.
Budan buryn Densaýlyq saqtaý mınıstri Aqmaral Álnazarova medıtsına qyzmetkerlerine shabýyl jasaǵandar 15 jylǵa deıin bas bostandyǵynan aıyrylatynyn málimdedi.