Qostanaıdaǵy arnaıy ortalyqta 16 jastaǵy qyzdy útikpen kúıdirgen

ASTANA. KAZINFORM — Polıtsııa osy oqıǵaǵa qatysty qylmystyq is qozǵady, dep habarlaıdy Kazinform tilshisi.

16 jastaǵy jasóspirimniń janjal kezinde ystyq útikpen kúıdirilgeni belgili boldy. Atalǵan iske mekeme tárbıeshileriniń biriniń qatysy bar bolýy múmkin. Polıtsııa málimetinshe, sotqa deıingi tergeý amaldary júrgizilip jatyr.

— Polıtsııa Qostanaıdaǵy damýynda aýytqýy bar balalarǵa arnalǵan áleýmettik qyzmetter ortalyǵynda bolǵan oqıǵaǵa baılanysty QR QK 110-baby, 2-bóligi, 1-pýnkti boıynsha qylmystyq is qozǵady. Sotqa deıingi tergeý aıasynda oqıǵanyń mán-jaıyn, onyń sebepteri men quqyqbuzýshylyq jasaýǵa ne ıtermelegenin anyqtaý úshin barlyq qajetti tergeý áreketteri júrgizilip jatyr, — delingen tártip saqshylary taratqan aqparatta.

Osyǵan deıin Saryaǵashta múgedektigi bar balany edende súıregen qyzmetkerge qatysty qylmystyq is qozǵalǵanyn jazǵanbyz.