Qostanaıda jylyna 500-den astam lıft shyǵarylady
QOSTANAI. QazAqparat - Oblys ortalyǵynda salynyp jatqan ındýstrııalandyrý aımaǵynda lıft shyǵaratyn zaýyttyń qurylysy bastalady, dep habarlaıdy QazAqparat tilshisi.
«VEK Qazaqstan» dep atalatyn lıftiler 2018 jyly satylymǵa shyǵady. Jaqyn kúnderi zaýyttyń irgetasy qalanyp, qurylys jumystary bastalady.
«Biz ındýstrıaldy aımaqtyń 2 myń sharshy metr aýmaǵynda lıft shyǵaratyn zaýyt salamyz. Qazirgi ýaqytta qajetti jabdyqtardy alyp qoıdyq. Birlesken kásiporyndaǵy lıft óndirisinde Qazaqstan úlesi 60%-ǵa jetedi. Jańa joba tabysty jáne suranysqa ıe bolatyndyǵyna senimdimin. Bıznes jospar 5 jylǵa shaqtalǵan», - dep atap ótti reseılik «VEK» kásipornynyń dırektory Mıhaıl Molochnıkov.
«VEK» kompanııasy lıft shyǵarýmen 2009 jyldan beri aınalysyp keledi. Onyń ónimderi Petropavl jáne Kókshetaý qalalaryna jetkizilgen. Joba boıynsha Qostanaıda jylyna 500-den astam lıft shyǵarylady.
Jalpy, qazirgi tańda oblys aýmaǵynda ındýstrııalandyrý baǵdarlamasy aıasynda 11 joba qolǵa alynyp jatyr. Olar iske qosylǵanda 4 200 adamdy turaqty jumyspen qamtýǵa múmkindik berilmek.
