Qostanaıda jylý jelilerin qarjylandyrý 14 esege artqan

ASTANA. QazAqparat – Qostanaı oblysynda jylý jelileriniń tozýyn 49,9%-dan 47,4%-ǵa deıin tómendetý josparlanýda. Bul týraly óńir basshysy Qumar Aqsaqalov málimdedi, dep habarlaıdy QazAqparat tilshisi.

«Jylýmen jabdyqtaý jelilerindegi apatty jaǵdaılardy boldyrmaý úshin bıyl qarjylandyrý 18 mlrd teńgege deıin ulǵaıtyldy. Bul ótken jylmen salystyrǵanda 14 esege kóp», - dedi ákim Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, qarajattyń negizgi bóligi Qostanaı, Rýdnyı, Arqalyq jáne Lısakov qalalaryn jylýmen jabdyqtaýǵa baǵyttalǵan.

«Bıyl barlyǵy 21,4 shaqyrym jylý jelileri qaıta jańartylady, tozý deńgeıi 49,9%-dan 47,4%-ǵa deıin tómendeıdi dep boljap otyrmyz. Jylýmen jelileriniń tozýyn 2029 jylǵa deıin 40%-ǵa deıin tómendetý maqsatynda jyl saıyn 20 shaqyrym jylý jelilerin qaıta jańartý josparlanýda», - dep tolyqtyrdy Qumar Aqsaqalov.

Sonymen birge, ákim Arqalyq qalasyna erekshe toqtaldy. Ondaǵy jylý jelileri 87% eskirgen.

«Rasynda da, Arqalyq qalasynda respýblıka boıynsha eń tozyǵy jetken jylý júıeleri bar. Premer-Mınıstr tapsyrmasymen biz barlyq qalada tehnıkalyq aýdıt júrgizdik. 1 maýsymǵa qaraı aýdıt aıaqtalyp, qaı qalada, qaı bólikterinde naqty qansha shaqyrym tozǵan júıe baryp kórip otyrmyz. Arqalyqta 37 shaqyrym jylý júıesi bolsa, bıyl sonyń 7 shaqyrymy jóndeledi», - dep jaýap berdi Q. Aqsaqalov agenttik tilshisiniń suraǵyna.

Osylaısha, Arqalyqtaǵy jylý júıeleriniń tozý deńgeıi 87%-ten 67%-ke tómendeıdi.

Al Prezıdent tapsyrmasyna saı, bul kórsetkish eń kemi 40%-ke deıin túsýi kerek. Ol úshin 2025 jyly da bul jumys jalǵasady.