Qostanaıda jylý kompanııasynyń avtobýsy qorshaýǵa soǵyldy
QOSTANAI. QazAqparat - Qostanaı qalasyndaǵy Voınov-Internatsıonalıstov kóshesinde jylý-energetıkalyq kompanııanyń avtobýsy kólik apatyna ushyrady, dep habarlaıdy QazAqparat tilshisi.
Eske salsaq, jol-kólik oqıǵasy búgin qaladaǵy 15-dúken mańynda bolǵan.
Qyzmettik avtobýs «Qostanaı jylý-energetıkalyq kompanııasy» MQK tıesili ekeni anyqtaldy. Muny agenttik tilshisine atalǵan kompanııanyń dırektory Asqar Bekpaǵanbetov aıtty.
«Sol kúni bizdiń qyzmetkerler kommýnaldyq tólemderge qaryzy kóp turǵyndarmen kezdesýge shyqqan. Egde jastaǵy avtobýs júrgizýshisi baqylaýshylardy biraz ýaqyt kútip otyrǵan. Avtobýsty tutatyp, qozǵala bergen sátte ol ózin jaısyz sezingen. Odan keıingi jaǵdaıdy jaqsy bilesizder. Qazir áriptesimiz qalalyq aýrýhanada em alyp jatyr», - dedi Bekpaǵanbetov.
Jylý kompanııasynyń dırektory aıtqandaı, búgin ujymdaǵy barlyq kólik júrgizýshileri medıtsınalyq tekserýden ótedi.
