Qostanaıda jylý energııasyna saralanǵan tarıf engizildi
QOSTANAI. QazAqparat - Qostanaı jylý-energetıkalyq kompanııasy jylýǵa saralanǵan tarıf engiziletini týraly habarlady. Jańashyldyq 1 mamyrdan júzege asyrylmaq. Saralanǵan tarıf jylýdy paıdalanýshylardyń barlyq sanatyna qatysty qoldanylady. Alaıda tólemderi ár túrli bolady.
Jylý kompanııasy ókilderi esepteý qurylǵysy ornatylǵan úılerdiń turǵyndary tómendetilgen tarıf boıynsha tólemaqy tóleıtinin atap ótti. Esepteý qurylǵysyn paıdalanbaıtyn turǵyndar úshin jylý baǵasy qymbattaý bolady.
2015 jyldyń 1 mamyrynan tarıf stavkasy tutyný birligi (gıgakalorııa) boıynsha kelesideı esepteletin bolady: - úılerinde esepteý qurylǵysy ornatylǵan turǵyndar bir Gkal (QQS eseptemegen jaǵdaıda) úshin 1999,24 teńge; al esepteý qurylǵysy joqtar bir Gkal (QQS eseptemegen jaǵdaıda) úshin 4337,52 teńgeden;
- esepteý qurylǵysy bar ózge tutynýshylar bir Gkal (QQS eseptemegen jaǵdaıda) úshin 5542,33 teńge, esepteý qurylǵysyn ornatpaǵandar bir Gkal (QQS eseptemegen jaǵdaıda) úshin 9923,61 teńgeden tóleıtin bolady. Tutynýshylar úshin páterdiń sharshy metrine shaqqandaǵy tarıf qandaı somany quraıtyny ázirge belgisiz. Ony Tabıǵı monopolııalardy retteý komıtetiniń departamenti bekitip, keıin tutynýshylarǵa ol jóninde aqparat taratylady.
