Qostanaıda jylqylarǵa GPS-baqylaý júıesi engizilmek
QOSTANAI. QazAqparat - Qostanaıda «Tsıfrlyq Qazaqstan» baǵdarlamasy sheńberinde jylqylarǵa GPS-baqylaý júıesi engiziledi, dep habarlaıdy QazAqparat oblystyq veterınarııa basqarmasynyń basshysy Berikjan Qaıypbaıǵa silteme jasap.
Basqarma basshysynyń pikirinshe, bul júıe óńirdegi mal urlyǵynyń azaıýyna yqpal etpek. Qazirgi ýaqytta qojalyq ıelerimen maldarynyń qaı aýmaqta júrgenin anyqtaýǵa múmkindik beretin elektrondy júıeni qostyrý boıynsha túsindirý jumystary júrgizilýde. Janýarlar joǵalǵan jaǵdaıda fotosýretter men ózine ǵana tán ereksheligi olardyń jyldam tabylýyna yqpal etetin bolady. Byltyr oblysta 2265 jylqyǵa chıpteý júıesi engizildi.
«2018 jyly bul joba pılottyq rejimde iske asty. Osy baǵyttaǵy jumystar bıyl da jalǵasyn tabady. Jospar boıynsha, áýeli, 50 jylqyǵa GPS-navıgator qurylǵysyn ornatamyz. Bul 3000 túliktiń jaıylyp júrgen jerlerin kórsetýge múmkindik beredi», - deıdi Berikjan Qaıypbaı.
GPS-baqylaý qurylǵysy maldyń moınyna taǵylatyn qarǵyǵa ońaı bekitilip, GPS spýtnıkti dabyl arqyly maldyń júrgen jerin anyqtaıdy. Atalǵan málimetter uıaly baılanys jelisi arqyly mal ıesiniń kompıýterine nemese uıaly telefonyna túsip otyrady
Qostanaıdaǵy tsıfrlandyrý salasynyń taǵy bir jańalyǵy - «Aqyldy sút fermasy» jobasy. Bul jańshyldyqty Qostanaıda júzege asyrý úshin Avstrııa elinen sarapshy mamandar arnaıy shaqyrtyldy. Olar oblystaǵy «Sadchıkov» JShS-ny Smaxtec baǵdarlamalyq-apparattyq júıesine qosty. Bul tehnologııanyń artyqshylyǵy mynada: «bolıýs» atty arnaıy qurylǵy sıyrlardyń aýyz qýysy arqyly qarnyna jiberilip, sol arqyly janýardyń jalpy jaǵdaıyn, negizgi fızıologııalyq parametrlerin tolyqtaı baqylap otyrýǵa bolady. Ár bes mınýt saıyn temperatýra qadaǵalaýda bolady. Bul janýardyń aýrý-syrqaýynyń aldyn alýǵa arnalǵan tyń tásil.
Sondaı-aq, qurylǵy qozǵalys belsendiligi týraly aqparat berip otyrady. Ol arqyly sıyrdyń uryqtandyrýǵa ázirligi anyqtalady. Álem boıynsha ázirge teńdesi joq osynaý «bolıýs» qurylǵysy, shamamen, sıyrdyń ishki qurylysynda bes jylǵa deıin saqtalady.
