Qostanaıda jylqylardy atyp, etin satyp júrgender ustaldy
QOSTANAI. QazAqparat - Qostanaı oblysynda jarty jyl boıy úı janýarlaryn atý arqyly urlyq jasap júrgender qolǵa tústi, dep habarlaıdy QazAqparat.
Aqparatty oblystyq polıtsııa departamentiniń baspasóz qyzmeti taratty. Osy jyldyń kóktem aılarynan beri polıtsııaǵa birneshe úıir jylqynyń joǵalǵany týraly habar kelip túsken. Sonymen qatar, Naýyrzym, Áýlıekól, Qarasý aýdandary men Jitiqara qalasynda úıir jylqynyń aıǵyrlary joǵalyp ketken.
«Mal urlyǵyna qatysty aýdandarda jedel izdeý toptary quryldy. Polıtseıler jaıylymdardy qarap, avtokólikterge tekserý júrgizgen. Іz kesý sharalarynyń birinde Naýyrzym aýdanynda 1993 jáne 1984 jyly týǵan eki er adam ustaldy. Olar Áýlıekól aýdanynyń turǵyndary ekeni anyqtaldy. Urylar jylqylardy atyp alyp, etin Qostanaı qalasyna satyp kelgen», - dedi oblystyq polıtsııa departamentiniń baspasóz hatshysy Irına Bejenar.
Oblystyq polıtsııa departameni bastyǵynyń orynbasary Janbolat Oljabaevtyń sózinshe, qazirgi ýaqytta kúdiktiler kinásin tolyǵymen moıyndaǵan.
«Olardyń 12 ret mal urlyǵyna qatysty bolǵany anyqtaldy. Oqıǵa ornynda túlikterdiń terileri, tuıaǵy tabylyp, zattaı derek retinde kórsetiledi. Jalpy, jyl basynan beri oblysta 115 mal urlyǵy faktisi tirkeldi», - dep atap ótti Janbolat Oljabaev.
