Qostanaıda jyl sońyna deıin 6 myń kólik qurastyrylady
Ázirge Reseıge alǵashqy partııalar synama retinde jiberildi. Tájikstanmen jyl sońyna deıin júz mashına satýǵa kelisim jasaldy. Eske salsaq, sáýir aıynda AllurGroup kompanııasy «KazakhExport» eksporttyq saqtandyrý kompanııasy men Qazaqstannyń Tájikstandaǵy elshiliginiń qoldaýymen «Holdıng Azııa Grýpp Tadjıkıstan» kompanııasymen ekijaqty kelisimge qol qoıǵan. Osy kelisim aıasynda 2018 jyldyń aıaǵyna deıin Tájik taksomotorlyq parki qazaqstandyq kóliktermen tolyqtyrylady.
«Búginde avtonaryqta básekelestik joǵary. Álemdik alpaýyttarmen ıyq tirestirý ońaı emes. Kásiporynnyń halyqaralyq áriptesterimen birlese qımyldaýyna jergilikti bılik te qoldaý jasap otyr. Jaqynda ǵana eki birdeı kelisimshartqa qol qoıyldy. Ras, memlekettiń qoldaýy kásiporyndy qandaı qıyn shaqta da quldyraýǵa jibergen joq. Búginde óndiris orny kólikterdiń túrin kóbeıtip, ónimderdegi qazaqstandyq úlesti arttyrýǵa kóshti. Birtindep syrtqy naryqqa da jol ashyla bastady.
Jospar boıynsha «SaryarqaAvtoProm» zaýyty jyl sońyna deıin alty myń dana kólikti satylymǵa shyǵarýǵa yntaly», - dedi Sergeı Mogılatov.
Kásiporyn Qytaı, Reseı, Ózbekstan sııaqty eldermen tyǵyz baılanysta. Sońǵy jeti jyl ishinde zaýyt 30 myń avtokólik qurastyrdy. Avtobýs óndirisi 12,4 esege artty. Jyl basynan beri 215 «Iveko» markaly avtobýs qurastyrylyp, Astanada ótken «EKSPO-2017» halyqaralyq kórmesine kelýshilerdi tasymaldaýǵa jóneltildi. Bıyl «SaryarqaAvtoProm» JShS-niń óndiristik alańynda ANKAI atty avtobýstardyń birlesken zaýyty iske qosyldy. Avtobýstar «Eýro 5» ekologııalyq talaptaryna saı keledi. Gazben de, dızeldi otynmen de júredi.
Aıta ketý kerek, kólikterdiń keıbir bólshekteri zaýytta shyǵarylady. Búginde onyń úles salmaǵy 33%-ǵa jetti.
«Mashına shanaqtary tórt deńgeıli syrlaýdan ótedi. Zamanaýı jabdyqtar jumysty sapaly, múltiksiz atqarýǵa múmkindik beredi. Kásiporynda usaqtúıindi qurastyrý tsehy iske qosylǵaly dánekerleý, syrlaý, quraý sııaqty jumystar joǵary sapada atqarylady», - dedi tehnıkalyq dırektor Sergeı Mogılatov.
Tehnıkalyq dırektordyń aıtýynsha, bıyl kásiporyn jeńil kólikter óndirisin 1,9 esege arttyrǵan. Sondaı-aq, 2126 jeńil kólik konveıerden shyqqan. Onyń ishinde 1149 - «Hıýndaı», 290 - «Ravon», 283 - «Djak», 173 - «Shevrole Nıva», 119 - «Pejo» jáne 19 «Ssan Iong» kólikteri satylymǵa shyǵaryldy. Barlyǵy 41,6 mlrd teńgeniń ónimderi óndirildi.
