Qostanaıda jyl basynan beri 6 bala qyzylsha aýrýyn juqtyrǵan
QOSTANAI. QazAqparat - Qostanaıda jyl basynan beri mektep jasyna deıingi balalar arasynda qyzylsha aýrýynyń alty oqıǵasy anyqtaldy. Bul týraly búgin baspasóz máslıhatynda qalalyq balalar aýrýhanasynyń bas dárigeri Qarlyǵash Álenova málimdedi, dep habarlaıdy QazAqparat.
Bas dárigerdiń aıtýynsha, bir jarym jasqa deıingi aýyrǵan balalardyń barlyǵy qyzylshaǵa qarsy ekpe qabyldamaǵan. Máselen, 1 jasqa deıingi úsh bala áli vaktsınatsııa jasyna jetpegen, al 1 jastan 1,5 jasqa deıingi úsh bala ár túrli sebeptermen egilmegen.
«Aýyrǵan balalardyń bári Astana qalasy men Aqmola oblysynda bolǵan kezde qyzylsha juqtyrǵany naqtylandy. Alty balanyń bireýi úıine shyǵaryldy, al qalǵandary áli em qabyldap jatyr. Qostanaıda balalar arasynda jappaı juqtyrý jaǵdaıy tirkelgen joq», - deıdi Qarlyǵash Álenova.
Qazirgi ýaqytta Astanada, Aqmola oblysynda jáne birqatar óńirde qyzylsha aýrýshańdyǵy deńgeıiniń artqany baıqalyp otyr. Sondyqtan, dárigerler ata-analarǵa ázirge bul óńirlerge bala ertip barýdyń qajeti joq ekenin eskertedi.
Qyzylsha - óte keń taralǵan ınfektsııalyq aýrý. Kóbinese balalarda kezdesedi. Onyń belgileri - dene qyzýynyń kóterilýi, murynnyń, kózdiń jáne tamaqtyń shyryshty qabyǵy qabynyp, teride bórtpelerdiń paıda bolýy. Aýrýdyń ınkýbatsııalyq kezeńi 7-den 21 kúnge deıin sozylady. Asqynyp ketse, qaıǵyly jaǵdaıǵa, ne balany múgedektikke ákep soqtyrýy múmkin. Ári bul dertpen balalar ǵana emes, eresekter de syrqattanýy múmkin deıdi dárigerler. Elimizde ótken jyldyń qarasha aıynan bastap 968 rastalǵan qyzylshanyń jaǵdaıy tirkelgen, onyń ishinde 80%-dan astamy 14 jasqa deıingi balalar arasynda. Al, syrqattardyń 67%-y - qyzylshaǵa qarsy ekpe qabyldamaǵandar.
