Qostanaıda jyl basynan beri 4 adam ıis tıip kóz jumdy
QOSTANAI. QazAqparat - Qostanaı oblysynda jyl basynan beri 4 adam ıis tıip kóz jumdy. Bul týraly jýrnalıstermen bolǵan kezdesýde oblystyq Tótenshe jaǵdaılar departamenti bastyǵynyń orynbasary Azamat Orymbaev málim etti, dep habarlaıdy QazAqparat.
Jalpy, jyl basynan beri oblysta 120 órt faktisi tirkelgen, saldarynan 8 adam kóz jumdy. Onyń ishinde 4 adamǵa ıis tıgen. Soǵan baılanysty óńirdiń TJD qyzmetkerleri órttiń aldyn alý úshin profılaktıkalyq sharalardy júrgizýde.
«9-10 aqpan aralyǵynda 2443 jeke turǵyn úı tekserildi. Taǵy 87 úıdiń ıeleri TJD mamandaryna esik ashpaǵan. Barlyǵy 278 kópbalaly otbasy tirkeýge alyndy. Jeke úılerde 750-ge jýyq órt qaýipsizdigi erejeleriniń saqtalmaýy baıqaldy. Olarǵa túsindirý jumystaryn ótkizdik», - dedi A.Orymbaev.
Órt sóndirýshiler júrgizgen reıdtiń kózdegeni de sol - turǵyndardy qaýipsizdik erejeleri týraly qulaǵdar etý, tilsiz jaýdyń aldyn alý. Ásirese, jeke menshik sektorda turatyndar úshin mundaı sharalar mańyzdy. Sebebi, byltyr qala boıynsha oryn alǵan tilsiz jaý faktileriniń deni jer úılerde bolǵan.
Saıajaılarda da órt qaýipsizdigin buzýǵa qatysty olqylyqtar kóp. Kóptegen adamdar órt qaýipsizdigi erejelerin saqtaımaıdy. Oqys oqıǵanyń aldyn alý maqsatynda TJD qyzmetkerleri reıd sharalaryn osy aýmaqta da júrgizdi.
