Qostanaıda jyl aıaǵyna deıin 36 myń kólik shyǵarylady
QOSTANAI. QazAqparat - Qostanaı oblysynda 47 myńǵa jýyq avtomobıl qurastyryldy. Mundaı aqparatty búgin keńeıtilgen alqa májilisinde Qostanaı oblysy ákiminiń orynbasary Erlan Qoıshybaev aıtty, dep habarlaıdy QazAqparat.
Oblysta mashına jasaý kólemin arttyrý jalǵasýda. Buǵan deıin munda mamandandyrylǵan aýyl sharýashylyǵy tehnıkasy men kombaın ǵana shyǵaryp kelgen. Al 2010 jyldan bastap jańa sala - avtomobıl jasaý tsehy quryldy. Búginde qostanaılyq «Saryarqa AvtoProm» JShS 9 túrli (Peugeot, Iveco, Hyundai, JAC, Chevrolet Niva, Ravon, MAN, Ankai) avtokóliktiń 50-den astam modelin óndirgen. Kólikter usaq jáne iri toraptyq qurastyrý ádisimen shyǵarylyp keledi.
«Bul rette mashına qurastyrýda jergilikti qamtý úlesiniń 38,2% - ǵa jetkeni biz úshin jetistik. Qazirgi ýaqytta Qostanaı alańynda 47 myńǵa jýyq avtomobıl óndirildi. Onyń ishinde 2018 jyly 12 myńnan astam jeńil kólik shyqsa, osy jyldyń 4 aıynda 5,3 myń kólik satylymǵa qoıyldy. Jospar boıynsha jyl sońyna deıin shamamen 36 myń avtomobıl shyǵarý josparlanǵan», - dedi Erlan Qoıshybaev óz baıandamasynda.
Osy jyldyń mamyr aıynda Qostanaı ákimdigi qytaılyq SMS jáne JAC kompanııalarymen kelisimshart jasasty. Nátıjesinde, taıaý 10 jylda sheteldik áriptestermen birigip, mashına qurastyrý salasyna 1,1 mlrd AQSh dollary somasynda ınvestıtsııa quıylady.
Oblys ákimi Arhımed Muhambetov kásiporynǵa óndiris kólemin arttyrýdy tapsyrdy. Onyń aıtýynsha, kásiporyn jylyna 100 myń birlikke deıin shyǵarýǵa qaýqarly. Sondaı-aq, avtomobılderdiń modeldik qataryn keńeıtý de mańyzdy meje sanalady.
Kólik logıstıkasynyń damýy Reseı, Tájikstan, Qyrǵyzstan, Belarý sııaqty elderge ónim jetkizý úlesin arttyrady. 2018 jyly eksportqa jalpy somasy 1,2 mlrd teńgege 291 avtokólik satylǵan. Bıylǵy qańtar-sáýir aılarynda kásiporyn 287 kólikti shetel asyrǵan. Nátıjesinde 1,1 mlrd teńge paıda tústi.
