Qostanaıda jyl aıaǵyna deıin 15 ınvestjoba iske qosylady
QOSTANAI. QazAqparat - Qostanaı oblysy ákimdiginde kelesi aıdaǵy mańyzdy qoǵamdyq-saıası oqıǵalardy ótkizý jospary talqylandy, dep habarlaıdy QazAqparat tilshisi.
Jıynda QR Tuńǵysh Prezıdenti kúnin, QR Táýelsizdigi kúnin merekeleý jáne astanany Aqmolaǵa kóshirý týraly Jarlyqtyń 20 jyldyǵyna ushtastyrylǵan is-sharalardyń bastalýy sóz boldy. Qostanaı oblysy ákiminiń orynbasary Marat Júndibaev jyl aıaǵyna deıin óńirde 47 nysan paıdalanýǵa beriletinin aıtty.
«Onyń ishinde 15 ınvestjoba iske qosylady. 10 turǵyn úı, 12 ınfraqurylymdyq nysan jáne taǵy 10 áleýmettik nysan qoldanýǵa beriledi. Búginde kelesi aıdaǵy mańyzdy qoǵamdyq-saıası oqıǵalardy ótkizýdiń oblystyq jospary daıyndalǵan. Barlyǵy 48 is-shara ótkizemiz», - dedi Marat Júndibaev óz baıandamasynda.
QR Tuńǵysh Prezıdenti kúnine baılanysty oblysta 2 halyqaralyq jáne 1 aımaqtyq ǵylymı-tájirıbelik konferentsııa uıymdastyrylady. Munyń syrtynda 4 oblystyq forým ótkizilmek. 1 jeltoqsan kúni qalalar men aýdandarda ekonomıka jáne áleýmettik salada jetistikterge jetken qyzmetkerler marapattalady.
«El júregi - Astana» kontseptsııasyna sáıkes, Astananyń 20 jyldyǵy 3 kezeń boıynsha atap ótiledi. Merekeleý osy jyldyń 10 jeltoqsanyna deıin bastaý alsa, ekinshi kezeń kelesi jyldyń shilde aıyna deıin aıaqtalady. Qorytyndy kezeń 2018 jyldyń jeltoqsanyna kózdelgen. Astananyń mereıtoıyna arnalyp, oblysta 116 mádenı-buqaralyq shara ótedi.
«Ár qala men aýdanda jergilikti jospar bekitilgen. Olar aı saıyn Qostanaı oblysy ákimdiginiń ishki saıasat basqarmasyna esep jiberip otyrady. «Astana - Táýelsizdiktiń jemisi» atty taqyryppen ár aımaqta kontserttik baǵdarlamalar usynylady», - dedi Júndibaev.
QR Táýelsizdigi kúnin merekeleý qarsańynda 7 ınvestjoba tusaýyn kesedi. «Baıan Sulý» AQ jańa óndiristik baǵytyn tanystyrsa, «Mılh» JShS sút óńdeý zaýytyn iske qosady. Sondaı-aq, Jitiqara jáne Sarykól aýdandarynda sýmen qamtamasyz etý nysandary paıdalanýǵa beriledi.
