Qostanaıda júrgizýshilerdi jasyryn patrýldeý bastaldy

QOSTANAI. QazAqparat - Qostanaıda jaıaý júrginshilerdi ótkizbeıtin júrgizýshilerdi jasyryn patrýldeý arqyly anyqtaıtyn bolady, dep habarlaıdy QazAqparat.

ІІM málimetinshe, patrýldeýdiń jańa ádisi jol qozǵalysy erejeleriniń basqa da óreskel buzýshylyqtaryn anyqtaýǵa múmkindik beredi.

Qyzmettik avtokólikterdegi jol qaýipsizdigin baqylaıtyn qyzmetkerler quqyq buzýshylyqty arnaıy qurylǵyǵa tirkeıdi, sodan keıin aqparat jaqyn mańdaǵy patrýlge beriledi.

»Jasyryn patrýldeýdiń negizgi mindeti kólik aǵynynda jol qozǵalysy erejelerin óreskel buzatyn júrgizýshilerdi anyqtaý bolyp tabylady. Bul tártipte jumys foto-beınetirkeý keshenderi joq jerlerde kómektesedi», - dedi Qostanaı qalasy PB JPQB bastyǵynyń orynbasary Almat Qarymsaqov.

Jyl basynan beri oblys ortalyǵynyń aýmaǵynda 67 JKO oryn aldy. Onyń 50%-nan astamy jaıaý júrginshilerdi qaǵyp ketýmen baılanysty.