Qostanaıda jumyrtqa men taýyq eti baǵasyn negizsiz kóterý faktisi tergelýde
ASTANA. QazAqparat - Monopolııaǵa qarsy den qoıý sharalary áleýmettik mańyzdy taýarlar naryǵynda baǵanyń negizsiz ósý faktisiniń jolyn kesýge múmkindik beredi.
Bul týraly Tabıǵı monopolııalar jáne básekelestikti qorǵaý komıtetiniń Qostanaı oblysy boıynsha departamentiniń basshysy Málik Madııarov aıtty, dep habarlady alau.kz.
«Jumyrtqa men taýyq etine baǵany negizsiz kóterip, qoldaǵany úshin 9 iri sýpermarket, osy ónimdi kóterme jetkizýshiler jaýapkershilikke tartyldy. Osy is boıynsha búginde óndirilip alynǵan aıyppul somasy 12 mln teńgeden asady. Jekelegen naryq sýbektileri boıynsha qazirgi ýaqytta sot talqylaýy bolyp jatyr», - dep atap ótti Málik Madııarov.
Onyń aıtýynsha, Qostanaı oblysynda ústem nemese monopolııalyq jaǵdaıǵa ıe memlekettik tizilimge engizilgen naryq sýbektileriniń sany eleýli azaıǵan. Buryn olar 77 bolǵan, qazir 14. «Bul Kásipkerlik kodekstiń erejelerine sáıkes Tizilimdi qalyptastyrý men júrgizý retteletin naryqtarda ǵana júzege asyrylatyndyǵyna baılanysty (Kodekstiń 173-baby).
2017 jylǵy 1 qańtardan bastap Tizilim múldem alyp tastalady dep josparlanýda. Munyń ornyna naryqtarda baǵany retteıtin, ony almastyratyn monopolııaǵa qarsy den qoıý mehanızmi keledi. Bul barynsha qatań qarjylyq saldary bar jumsaq tetik bolmaq», - dedi ol.
