Qostanaıda jumyrtqa baǵasy kúrt qymbattady

QOSTANAI. QazAqparat – Qostanaı oblysynda jumyrtqa baǵasy birden 70-80 teńgege qymbattap ketti, dep habarlaıdy QazAqparat tilshisi.

Qostanaı turǵyndary jumyrtqanyń qymbattaýyn eldi mekenderdegi karantın men Arqalyqtaǵy qus fabrıkasynyń ýaqytsha jabylyp qalýymen baılanystyrady. Sebebi, qyrkúıek aıynda saýda ortalyqtarynda «Jas qanat» fabrıkasynan shyǵatyn 1-sanattaǵy 10 dana jumyrtqa 280-285 teńge tursa, qazirgi baǵasy 360-370 teńgege jetken. Aıta keteıik, Qostanaı oblysynda qus tumaýy taraǵan 8 eldi mekende karantın jarııalandy .

«Qostanaı qalasynyń ortalyq bazarynda da osy jaǵdaı. Jumyrtqanyń iriktelgen, joǵary surypty túrleri sońǵy apta ishinde birneshe ret kóterildi. Burynǵydan 60-70 teńgege ósip ketken. Aýyldar karantınge jabyldy ǵoı. Baǵanyń ósýi sodan bolýy tıis», - deıdi qala turǵyny Gúlnur Meıramqyzy.

Al Qostanaı qalalyq ákimdiginiń ókilderi bul jaǵdaı jumyrtqanyń qymbattaýyna áser etken joq dep otyr.

«Jumyrtqa baǵasy asa qatty qymbattaǵan joq. Qazir turaqtandyrý qorynda belgilengen jumyrtqa baǵasy 270-280 teńgeniń tóńireginde. Al naryqtaǵy baǵanyń azdap ósýine basqa jaǵdaılar yqpal etip otyr. Qazir qustyń jemi qymbattady, kommýnaldyq qyzmet baǵasy ósti. Buǵan qus tumaýynyń qatysy bar dep resmı túrde aıta almaımyz. Baǵany turaqtandyrýda aýylsharýashylyǵy jármeńkesiniń mańyzy zor. Qostanaıda 17 qazanda jármeńke ótkizýdi josparlap otyrmyz. Sol kezde 10 dana jumyrtqa 270 teńgeden satylatyn bolady», - dedi Qostanaı qalasy ákimdiginiń kásipkerlik bóliminiń jetekshisi Ilona Tımoshenko.

Eske sala keteıik, búgin Arqalyq qalasyndaǵy qala quraýshy kásiporyn «Agroınterqus» JShS jumysyn ýaqytsha toqtatty .