Qostanaıda júkti áıel otyrǵan jedel járdem kóligi qar qursaýynan qutqaryldy
QOSTANAI. QazAqparat - Soltústik óńirlik aeroutqyr jedel-qutqarý jasaǵy bólimshesiniń qutqarýshylary júkti áıeldi qutqaryp qaldy, dep habarlaıdy QazAqparat oblystyq TJD baspasóz qyzmetine silteme jasap.
Qardyń qalyń túsýi jáne aýa temperatýrasynyń kúrt tómendeýi saldarynan avtomobıl joldaryndaǵy kórý múmkindigi de qıyndaıdy. Sondyqtan, qutqarýshylar kez kelgen ýaqytta shuǵyl jaǵdaılarǵa daıyn turady.
«2019 jylǵy 5 aqpanda saǵat 21:00-de TJD kezekshilik bólimine Arqalyq qalasynan 120 shaqyrymdaǵy Ekidiń aýylynda júkti áıeldi jedel aýrýhanaǵa jetkizý qajettigi jóninde habarlama kelip tústi. Arqalyq qalasyndaǵy Soltústik óńirlik aeroutqyr jedel-qutqarý jasaǵy bólimshesiniń qutqarýshylary ótimdiligi joǵary Nıva Marsh-BRONTO arnaıy tehnıkasymen shaqyrtý ornyna shyqty. Arqalyq qalasynan 110 shaqyrym júrip ótkennen keıin Jańaqala aýylynyń mańynda salonynda júkti áıel jáne medıtsınalyq qyzmetker bar jedel járdem brıgadasyn kezdestirdi. Qutqarýshylar júkti áıeldi erip júrgen adamdarmen ótimdiligi joǵary tehnıkaǵa otyrǵyzyp, Arqalyq perzenthanasyna oıdaǵydaı jetkizdi», - delingen vedomstvonyń habarlamasynda.
TJD qyzmetkerleri óńirde qardyń qalyń túsýine baılanysty tasjoldardaǵy qaýipsizdikti qamtamasyz etý úshin arnaıy tehnıkalardy saqadaı saı etken.
Soltústik óńirlik aeroutqyr jedel-qutqarý jasaǵy turǵyndarǵa qolaısyz aýa raıy kezinde óz eldi-mekenderiniń aýmaǵynan tys jol júrýdi toqtatýdy usynady.
Buǵan deıin oblystyq TJD baspasóz qyzmeti Sarykól aýdanynda eki balyqshynyń adasyp ketkenin habarlaǵan bolatyn.
