Qostanaıda júkti áıel avtobýsta qabyrǵasyn syndyryp aldy
ASTANA. QazAqparat - Qostanaıda júkti áıel avtobýsta qabyrǵasyn syndyryp aldy, dep habarlady alau.kz .
Jeti aılyq júkti Danııa Danııarova №8 marshrýtpen dárigerge josparly qabyldaýǵa bara jatyp, Qostanaı qalalyq aýrýhanasynyń travmotologııalyq bóliminen bir-aq shyqty. Syrtqa shyǵýǵa daıyndalǵan kelinshek tutqadan ustap turǵan. Zardap shegýshiniń aıtýynsha, júrgizýshi jol boıy jyldamdyqty asyryp, tejegishti kúrt basyp otyrǵan. Osylaısha kezekti tejeý barysynda áıel qulap qalǵan.
«Jolaýshylar maǵan kómektespedi. Júrgizýshi keshirim suramaq túgili, járdem berýdi de oılamady. Qatty aýyrdy. Ol kezde tek balamnyń amandyǵyn oıladym», - dedi Danııa Danııarova.
Aýrýhanada oǵan tós qýysy soǵylǵanyn, onynshy qabyrǵasynyń synǵanyn aıtty. Balanyń jaǵdaıy jaqsy. «Júrgizýshiniń kómek kórsetýge tyryspaǵanyna, keshirim suramaǵanyna renjidim. Ár túrli jaǵdaı bolýy múmkin edi ǵoı. Ony izdegen joqpyn, biraq avtobýsqa minýge qorqyp qaldym», - dedi zardap shegýshi.
