Qostanaıda júk kóligimen soqtyǵysqan soń, jeńil kólik aryqqa qulady
ASTANA. QazAqparat - Jol-kólik oqıǵasy 1-qazan kúni Qaıyrbekov kóshesindegi «Zapoı» dámhanasynyń mańynda boldy.
«Lada Prıora» jeńil kóligi «Gaz» markili júk kóligimen soǵysyp, janyndaǵy kommýnaldyq qyzmet ókilderi qazǵan transheıaǵa túsip ketti. Bul týraly oqıǵanyń kýágerleri áleýmettik jelide habarlady.
Sýretterge qaraǵanda, júk kóligi qazylǵan transheıanyń shetinde turyp qalǵan, sonymen qatar onyń kýzovynyń aldyna zaqym kelgen.
Áleýmettik jeli paıdalanýshylar jol-kólik oqıǵasynyń oryn alýyna «Lada» kóliginiń júrgizýshisin kinálap otyr. Óıtkeni ol joldyń qarsy jolaǵyna shyǵyp ketken.
Kýágerler transheıa aımaǵyna qandaı da bir belgilerdiń qoıylmaýyna ashýly.
Alaıda, osy oqıǵadan soń kommýnaldyq sala qyzmetkerleri jaǵdaıdy rettedi. Arnaıy tehnıkanyń kómegimen transheıaǵa túsip ketken kólikti alyp shyqty. Zardap shekkender joq.
