Qostanaıda Joldaýdy iske asyrýdaǵy azamattyq qoǵamnyń róli aıtyldy
QOSTANAI.KAZINFORM — 5 qarashada Qostanaı qalasyndaǵy Jastar saraıynda Qazaqstan Respýblıkasy Prezıdentiniń «Jańa tarıhı kezeńdegi Qazaqstannyń ózekti mindetteri» atty Joldaýyna arnalǵan «Qaz Talks» dıalog alańy ótti.
Іs-sharaǵa memlekettik organdardyń, qoǵamdyq uıymdardyń, kásipodaqtar men etnomádenı birlestikterdiń ókilderi, mádenıet pen sport, jastar jáne buqaralyq aqparat quraldarynyń ókilderi qatysty.
Dıalog alańynyń spıkerleri qatarynda Qazaqstan Respýblıkasy Quryltaıynyń depýtaty Ekaterına Smyshlıaeva, Qazaqstan Halyq Keńesiniń músheleri Tólegen Kúnádilov pen Rafaıl Gadjıbalaev, QR Ulttyq ekonomıka vıtse-mınıstri Erlan Saǵnaev, QR Eńbek jáne halyqty áleýmettik qorǵaý mınıstrligi Halyqty áleýmettik qorǵaý salasyndaǵy retteý jáne baqylaý komıtetiniń tóraǵasy Ilıa Skýb boldy.
Kezdesý barysynda Joldaýdyń negizgi baǵyttary túsindirilip, reformalardy zańnamalyq qamtamasyz etý, ekonomıkany damytý, áleýmettik saıasatty jetildirý, azamattyq qoǵamnyń rólin arttyrý jáne etnosaralyq kelisimdi nyǵaıtý máseleleri boıynsha aqparat berildi.
Alǵashqy bolyp sóz alǵan Ekaterına Smyshlıaeva eldegi aýqymdy ózgeristerdi zańnamalyq turǵydan qamtamasyz etý máselelerine toqtaldy. Ol strategııalyq mindetterdi iske asyrýda zamanaýı talaptarǵa saı keletin berik quqyqtyq negiz qalyptastyrýdyń mańyzyn atap ótti.
Qazaqstan Halyq Keńesiniń múshesi Tólegen Kúnádilov azamattyq qoǵamnyń reformalardy iske asyrýǵa qatysýy, ınfraqurylymdy jańǵyrtý jáne áleýmettik ádilettilik baǵyttaryn túsindirdi. Onyń aıtýynsha, «Halyqtyq qurylys» bastamasy aıasynda júzege asyrylatyn jobalar halyqtyń naqty qajettilikterine baǵyttalýy tıis. Osy rette qurylys sapasyna, bólingen qarajattyń maqsatty jumsalýyna jáne jobalardyń ýaqytyly oryndalýyna qoǵamdyq baqylaý júrgizýdiń mańyzy erekshe. Sondaı-aq otandyq óndirýshilerdi qoldaý, jańa jumys oryndaryn ashý, eńbek qaýipsizdigi men áleýmettik jaýapkershilikti qamtamasyz etý máselelerine nazar aýdaryldy.
Ulttyq ekonomıka vıtse-mınıstri Erlan Saǵnaev Joldaýda kózdelgen ekonomıkanyń turaqty ósýi, kásipkerlikti damytý, ınvestıtsııa tartý jáne óńirlerdiń ekonomıkalyq áleýetin tıimdi paıdalaný baǵyttaryn túsindirdi. Ekonomıkalyq ósimniń halyq tabysynyń artýyna, jańa jumys oryndarynyń ashylýyna jáne ómir súrý sapasynyń jaqsarýyna yqpal etýi mańyzdy ekeni aıtyldy.
Eńbek adamdarynyń mártebesi men jumysshylardyń áleýmettik qorǵalýyna da erekshe nazar aýdaryldy. Bul jóninde «Qostanaı oblysy orman sharýashylyǵy kásiporyndary qyzmetkerleriniń jergilikti kásipodaǵy» QB tóraǵasy, orman sheberi Maksım Makrýshın óz pikirin bildirdi:
— Árbir qyzmetker úshin eńbeginiń laıyqty baǵalanýy, jalaqysynyń jetkilikti bolýy jáne qaýipsiz eńbek jaǵdaılarynyń qamtamasyz etilýi mańyzdy. Sondyqtan óndiristi damytýǵa, jańa jumys oryndaryn ashýǵa jáne azamattardyń áleýmettik qorǵalýyn arttyrýǵa baǵyttalǵan bastamalardyń mańyzy zor. Bul ózgerister tek josparlar men baǵdarlamalar deńgeıinde qalyp qoımaı, árbir otbasynyń kúndelikti ómirinen kórinis tabýy qajet, — dedi Maksım Makrýshın.
Áleýmettik saıasat máselelerine toqtalǵan Ilıa Skýb memlekettik qoldaýdyń ataýlylyǵyn arttyrý, áleýmettik osal toptardy qorǵaý jáne áleýmettik qyzmetterdiń qoljetimdiligin qamtamasyz etý baǵyttaryn túsindirdi.
Al Rafaıl Gadjıbalaev qoǵamdyq kelisim men etnosaralyq tatýlyqty nyǵaıtý máselelerine nazar aýdardy. Ol etnomádenı birlestikterdiń qoǵamdaǵy birlik pen ózara qurmetti qalyptastyrýdaǵy mańyzdy rólin atap ótti.
Іs-shara sońynda qatysýshylar spıkerlerge suraqtar qoıyp, Joldaýdyń negizgi baǵyttary boıynsha qosymsha aqparattar aldy.
Kezdesý barysynda belgilengen mindetterdi iske asyrýda memlekettik organdarmen qatar qoǵamdyq ınstıtýttardyń, bıznes ókilderiniń jáne azamattardyń da belsendi qatysýy mańyzdy ekeni atap ótildi. Negizgi maqsat — reformalardyń naqty nátıjesin qamtamasyz etý, óńirlerdiń áleýetin arttyrý jáne halyqtyń ál-aýqatyn jaqsartý.
«Qaz Talks» dıalog alańy Joldaýdyń basym baǵyttaryn keńinen túsindirýge, qoǵam ókilderiniń suraqtaryna jaýap berýge jáne memleket pen qoǵam arasyndaǵy baılanysty nyǵaıtýǵa múmkindik berdi.
