Qostanaıda jolaýshyny avtobýsqa maskasyz kirgizbegen júrgizýshi soqqyǵa jyǵyldy
QOSTANAI. QazAqparat – Qostanaı turǵyny maska taǵýdy talap etken avtobýs júrgizýshisin soqqyǵa jyqty, dep habarlaıdy QazAqparat.
Qostanaı oblysy ákimdigi janyndaǵy aqparattyq shtabtyń málimetine súıensek, oqıǵa búgin tańerteń bolǵan.
«№11 marshrýt avtobýsynyń júrgizýshisin jolaýshy soqqyǵa jyqqan. Júrgizýshi jolaýshyny maskasyz avtobýsqa kirgizbegen jáne shyǵýdy ótingen. Alaıda jas jigit talapty elemegen. Maska taǵýyn talap etken júrgizýshini uryp-soǵyp, avtobýstan qashyp ketken. Oqıǵa týraly 102 pýltine habar tústi. Polıtsııa quqyq buzýshyny izdep jatyr»,- deıdi shtabtaǵylar.
Qazir osy derek boıynsha QR Qylmystyq kodeksiniń 293-babymen tergeý bastaldy.
Qostanaı oblysy ákimdigi janyndaǵy aqparattyq shtab tótenshe jaǵdaılar rejımin saqtaý boıynsha talaptarǵa túsinistikpen qaraýdy suraıdy.
