Qostanaıda jol ústindegi ushaq qaıdan kelgeni anyqtaldy
QOSTANAI. QazAqparat - Qostanaıda qala turǵyndary ózge kóliktermen bir qatarda jol ústinde qozǵalǵan ıAK-40 ushaǵyn qyzyqtap, sýretke, beınetaspaǵa túsirip, ǵalamtorda talqylaýda, dep habarlaıdy QazAqparat tilshisi.
Bul «Aq-suńqar» avıakompanııasyna tıesili isten shyqqan ıAK-40 ushaǵy bolyp shyqty. Eskirgen áýe kemesin Qostanaı áýejaıynan Zatoboldaǵy aerodromǵa avtokólik jolymen kóshirý sheshilgen. Muny avıakompanııa prezıdenti Vladımır Dosmaǵambetov málimdedi.
Onyń aıtýynsha, ıAK-40 ushaǵy tabany kúrekteı 44 jyl qyzmet kórsetken.
«Ushaqty qaıta jóndeýdiń mánisi joq ári kóp shyǵyn qajet etedi. Bul ushaqta oblystyń burynǵy ákimderi, kóptegen mınıstrler san márte áýe jolyna kóterilgen. Endi ıAK-40 oqý-jattyǵýdaǵy kómekshi quralǵa, sondaı-aq ekskýrsııalyq nysanǵa aınalatyn bolady. Oǵan arnaıy angar salamyz", - deıdi V.Dosmaǵambetov.
Ushaqty Zatobolǵa jetkizý úshin onyń qanattary men artqy bóligi kesilgen. Tasymalǵa mamandar eki aı daıyndalǵan. Olar munyń sırek kezdesetin ári kúrdeli sharýa ekenin aıtýda. Ushaq dittegen jerine deıin avtokólik jolymen 4 saǵat júrgen, barlyǵy 36 shaqyrym qashyqtyqty eńsergen.
