Qostanaıda jol tazalaýshy tehnıkalarǵa GPS-qurylǵylar ornatyldy

QOSTANAI. QazAqparat - Tsıfrlandyrý baǵdarlamasy sheńberinde oblystaǵy 9 jol basqarmasy arnaıy tehnıkalarǵa GPS-qurylǵylar engizdi, dep habarlaıdy QazAqparat.

Turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi basshysynyń mindetin atqarýshy Bolat Seıdahmetov aıtqandaı, GPS-qurylǵylar toǵyz aýdandaǵy jol-paıdalaný ýchaskesiniń kólikterine ornatyldy. Buǵan bıýdjetten 972 myń teńge jumsaldy.

«Qazirgi ýaqytta jabdyqtardy dıagnostıkalaýdy bastap kettik. Biz GPS-qurylǵylar arqyly tehnıkalardyń ornalasqan aımaǵy men jyldamdyǵy, janar-jaǵarmaı paıdalaný kólemin bile alamyz. Óz kezeginde bul baǵyt kestesin ońtaıly júrgizýge múmkindik beredi. Artyq ysyrap bolmaıdy. Arnaıy tehnıkalardy qajetti jumystarǵa ǵana bólemiz», - dedi maman.

Bolat Seıdahmetovtiń túsindirýinshe, zamanaýı qurylǵy kólik 6-9 aıda óziniń qunyn óteıdi. Buǵan qosa, GPS-qurylǵylar shyǵyn kólemin 15-20% qysqartpaq. Aıta ketý kerek, óńirdegi respýblıkalyq jáne oblystyq mańyzy bar avtomobıl joldaryna jaryqdıodty aqparattyq tablo ornatý josparlanyp otyr. Osy arqyly poıyzdardyń kelý-ketý ýaqytyn, baǵytyn bilýge bolady.