Qostanaıda jol talǵamaıtyn avtokólikter shyǵarylady
QOSTANAI. QazAqparat - Qostanaı qalasyndaǵy «SaryarqaAvtoProm» JShS bazasynda mashına jasaý salasyn kadrmen qamtý máselesine arnalǵan jıyn ótti, dep habarlaıdy QazAqparat.
Búgingi basqosýǵa jergilikti JOO basshylary, kolledj jáne mektep dırektorlary, bilim basqarmasy men kásipodaq uıymdarynyń ókilderi, sondaı-aq stýdentter men oqýshylar qatysty. Basty maqsat - jyl sanap damyp kele jatqan jergilikti avtoóndiriske qajetti mamandardy daıarlaýdyń ońtaıly jolyn qalyptastyrý. Jıynǵa qatysýshylar kásiporynnyń óndiris tsehtaryn aralap, otandyq mashınanyń qalaı qurastyrylatynyn óz kózderimen kórdi. Odan keıin alqa otyrysynda bas qosyp, jergilikti bilim oshaqtarynda bolashaq mashına qurastyrýshy mamandardy daıarlaý máselesin, dýaldy bilimdi damytý joldaryn talqylady.
«Bıyl biz JAC avtokóliginiń jol talǵamaıtyn S7, T6 pıkap úlgilerin shyǵarýdy qolǵa alamyz. Al 2019-2021 jyldar aralyǵynda JAC, ANKAI, HOWO, HANTENG avtokólikteri men avtobýstar qurastyrylady. Osyǵan oraı, bıyl zaýytqa 250 mamandy jumysqa qabyldaýdy kózdep otyrmyz», - deıdi «SaryarqaAvtoóndiris» JShS dırektorynyń orynbasary Sergeı Mogılatov.
Byltyr jeltoqsan aıynda «Allıýr» kompanııalar toby» AQ men qytaılyq «Genertec» kompanııasy «SaryarqaAvtoóndiris» seriktestiginde avtoónerkásip áleýetin arttyryp, avtokólik qurastyrý salasyndaǵy qazaqstandyq úlesti 50%-ke jetkizýdi kózdeıtin ınvestıtsııalyq kelisimke otyrǵan bolatyn. «Genertec» kompanııasynyń basqarma tóraǵasy Lý Iımın oblys ákimimen kezdesýinde qostanaılyq avtoónerkásipti dáýirleý kezeńi kútip turǵanyn, bolashaqta óndiriske jańa tehnologııanyń eń ozyq úlgileri engiziletinin aıtqan edi.
Forým barysynda mashına jasaý zaýyty men oblystyq bilim basqarmasy jáne kásipodaq arasynda úshtarapty memorandýmǵa qol qoıyldy.
Buǵan deıin habarlaǵanymyzdaı, Qostanaı oblysynyń ákimi Qazaqstan Prezıdentine avtomobıl óndirisin damytý, ınvestıtsııa tartý jáne ındýstrııalyq jobalardy iske asyrý jumystarynyń nátıjeleri týraly málim etken bolatyn.
