Qostanaıda jol sapasyna salǵyrt qaraǵan 97 laýazymdy tulǵa jaýapqa tartyldy
QOSTANAI. QazAqparat – Qostanaıda avtojoldardy tıisti dárejede ustamaǵany úshin 97 laýazymdy tulǵa jaýapqa tartyldy, dep habarlaıdy QazAqparat oblystyq Polıtsııa departamentiniń baspasóz qyzmetine silteme jasap.
2020 jyldyń 7 aıynda oblystyq Polıtsııa departamentine qarasty jol-tehnıkalyq ınspektsııasynyń mamandary 12 myń shaqyrymnan astam avtojolda 903 tekserý júrgizgen. Onyń qorytyndysy boıynsha anyqtalǵan kemshilikterdi joıý úshin 1014 uıǵarym shyǵaryldy.
Oblystyq Polıtsııa departamenti ákimshilik polıtsııa basqarmasynyń bastyǵy Andreı Grıgorevskııdiń aıtýynsha, jol-kólik oqıǵalaryn azaıtý jáne joldarda tótenshe jaǵdaılardy boldyrmaý maqsatynda turaqty negizde tekserý uıymdastyrylady.
«Avtomobıl joldaryn qanaǵattanarlyq jaǵdaıda ustamaǵany jáne jol qozǵalysy qaýipsizdigin qamtamasyz etpegeni úshin 97 laýazymdy tulǵa jaýapqa tartylyp, 2639 100 teńge somasyna aıyppul salyndy. «QazAvtoJol» AQ Qostanaı oblystyq fılıaly, «Qazaqavtojol» JShS Qostanaı oblystyq fılıaly jáne Qostanaı oblysynyń jolaýshylar kóligi jáne avtomobıl joldary basqarmasy ókilderimen birlesip, oblysy aýmaǵy arqyly ótetin avtomobıl joldaryn keshendi tekserý josparlanýda. Jyl basynan beri oblys aýmaǵynda 157 jol-kólik oqıǵasy tirkeldi, onda 23 adam qaza taýyp, 214 adam túrli dárejedegi jaraqat aldy. Sol sebepti joldyń sapasy adam qaýipsizdigi úshin de mańyzdy», - deıdi Andreı Grıgorevskıı.
Jalpy, Qostanaı oblysyndaǵy avtojoldardyń uzyndyǵy – 11220 shaqyrym. Onyń ishinde 1408 shaqyrym respýblıkalyq dárejege ıe.
