Qostanaıda joǵalyp ketken turǵynnyń denesi úsh jyldan keıin tabyldy
Qostanaı oblysy polıtsııa departamentiniń krımınaldyq polıtsııa qyzmetkerleri birneshe jyl burynǵy jasalǵan taǵy bir qylmysty ashty. Polıtsııa 2017 jyldan bastap habar-osharsyz ketken 29 jastaǵy oblys ortalyǵynyń turǵynyn izdestirgen.
«Ótken jyly jer úıdiń káriz sýy jınalatyn jerden belgisiz er adamnyń denesiniń bólikteri tabyldy. Polıtsııa qyzmetkerleri qylmystyq isti tergeý jáne belgisiz máıittiń kimdiki ekenin anyqtaý úshin on jyl ishinde habar-osharsyz joǵalǵan barlyq adamdarǵa taldaý júrgizdi. Sondaı-aq polıtseıler sońǵy bes jylda máıit tabylǵan meken-jaıǵa túsken barlyq ótinimderge taldaý jasady», – dedi B. Aımaǵambetov.
Nátıjesinde onyń neden ólgeni anyqtaldy.
«Qaıtys bolǵan adam úı salý kezinde birneshe jaldamaly jumysshymen tanysqan. Іshimdik ishkenniń saldarynan tóbeles shyǵyp, olar jigitti óltirgen, al máıitin káriz tundyrǵysyna laqtyrǵan. Úsh jyl buryn osy meken-jaıda tóbeles bolyp jatqany týraly polıtsııaǵa ótinish túsken. Barlyǵynan jaýap alynyp, polıtsııaǵa jetkizilgen. Oqıǵaǵa qatysýshylardyń biriniń aıǵaqtarynda olarmen belgisiz jigit bolǵandyǵy aıtylǵan. Alaıda ol keıinnen tóbeles bolǵan jerden qashyp ketken delingen. Jedel-tergeý is-sharasyn júrgizý barysynda qaza tapqan adamnyń jeke basy jáne onyń óliminiń mán-jaıy anyqtaldy», – dep tolyqtyrdy polıtsııa departamentiniń basshysy. Kúdikti ustalyp, qamaýǵa alyndy.
